Vawiinah Boxing semifinal

National Games 2022 boxing semifinal chu vawiin hian Mahatma Mandir Venue 3, Gandhinagar-ah khelh a ni dawn a, Mizo tlangval pahnih Lallawmawma leh Malsawmtluanga te an inlan ang.

Middleweight-ah Lallawm-awma chuan vawiin tlai dar 3:45 hian Services boxer Mohemmed Hussain Udin a hmachhawn ang a, middleweight-ah Malsawmtluanga'n vawiin tlai dar 5:15 hian Goa boxer Pushpender Ashok Rathee a hmachhawn ang. Mizo boxer-ten a chhe berah medal pahnih an hawn dawn tih a chiang tawh.

Lunglei Electric tlangval Mala hian first round-ah Sahil Aslambhai Nilgar chu unanimous decision (5-0) a a hneh hnuah nimin tlai khan Uttarkhand boxer Pankaj Kumar chu unanimous decision (5-0) bawkin a hneh. Mala khingpui tur Pushpender hian semifinal thleng turin Himachal boxer Dharm Pal leh Uttar Pradesh boxer Gagandeep te a hneh ve bawk.

Tuipui boxer Lawmawma hian first round-ah Rajasthan boxer Jitendra Choudhary chu unanimous decision (5-0) in an hneh a, quarterfinal-ah erawh Himachal Pradesh boxer Ashish Kumar chu split decision (3-2) in a hneh. Lawmawma khingpui tur Services boxer Mohammed Hussain hian Uttar Pradesh boxer Satish Kumar leh Delhi boxer Rohit Mor te unanimous decision ve vein a hneh thung.

Mizoram coach Lalfakzuala chuan, "Pathian kutah engkim kan nghat a, min awmpuina zarah tun dinhmun thleng thei hi kan ni. Mizoram tan medal hawn ngei kan tum a, kan chakna Lalpa hmangin kan tum ram kan thlen ngei kan beisei," tiin Vanglaini a hrilh.

Mizoram boxer-te hi coach pahnih Lalfakzuala (SYS), Chanmari Lunglei leh B. Lalhriatpuii, Nursery ten an hruai a, boxer panga - mipa pathum leh hmeichhe pahnih an hruai a ni.