Vawiin aṭangin U17 Women's World Cup

2022 FIFA U-17 Women's World Cup chu vawiin aṭangin khelh ṭan a ni dawn. Vawiin tlai dar 4:30 hian Morocco leh Brazil te Kalinga Stadium, Bhubaneswar, Odisha-ah an inkhel ang.

Tlai dar 4:30 vek hian Fatorda Stadium, Margao, Goa-ah Chile leh New Zealand an inkhel bawk dawn. Zanin dar 8:00 hian inelna thlengtu India an inlan dawn a, Kalinga Stadium-ah United States nen an inhmachhawn ang.

Inelnaah hian team 16 an tel. Group A-ah India, United States, Morocco leh Brazil te an awm. Group B-ah Germany, Nigeria, Chile leh New Zealand te an awm a, group C-ah Spain, Colombia, Mexico leh China te an awm thung.

Group D-ah Japan, Tanzania, Canada leh France te an awm bawk. Group tin aṭang hian a sang pahnihin quarterfinal an lut ang. Inelna hi khawpui pathum Bhubaneswar, Margao leh Navi Mumbai-ah te khelh tur a ni.

Inkhel hi Sports 18 leh Sports 18 HD-ah te live a ni dawn a, Voot Select app-ah live stream a ni bawk ang. India team-ah hian Mizo an tel pha lo.