Club tana goal 700 khungtu Ronaldo

Cristiano Ronaldo chuan club tan goal 700-na a khung a, Goodison Park-ah Manchester United chakpuiin Everton 2-1 in an hneh. Kum 37 mi Ronaldo hi bench aṭangin a lut a, minute 44-naah Casemiro ball pek um lutin goal ṭha bik a khung.

Goal 700 chu
Ronaldo hian Sporting Lisbon aṭanga career ṭanin Portuguese club hi goal nga a khungsak a, Old Trafford a pan hnuah Real Madrid lamah a kal. Portugal captain hian Los Blancos tan goal 450 tehmeuh a khung a, Italy panin Juventus tan goal 101 a khung leh bawk.

Player ropui bik Ronaldo hian hming a chherna Manchester United-ah kir lehin a hun hmasa lama a khung tawh nen English club tan hian goal 144 a khung.

Ronaldo elpui chu Lionel Messi a ni a, Argentine forward hi tun season-ah a che ṭha. Portuguese forward hi bench-ah hun a hman tam avangin Messi hi goal 700 khung hmasa tura ringtu an awm hial.

Argentine forward hian club tan goal 691 a khung tawh a, goal 700 khung nan goal kua chiah mamawh tawh mah se Ronaldo hian goal 700 a thleng hmasa ta zawk. Amaherawhchu career tawp hunah tuin nge goal khung tam zawk tih chu hunin a hril ang.

Casemiro a langsar
Erik Ten Hag-a'n Everton hmachhawn turin pound maktaduai 70 man Casemiro chu bul a ṭantir a, Brazilian midfielder hian ball a hloh avangin Toffees-in goal an khung hmasa zawk. Alex Iwobi chuan minute ngana lekah yard 25 zet aṭangin a hlai lut.

Man United an insiamrem vat a, minute 15-naah Anthony Martial ball pekluh chu Antony-a'n ṭha zetin a pet goal. Brazilian forward hian Man United tan league match vawi thum a khelhah goal a la khung vek.

Martial a inhliam avangin Ronaldo a rawn lut a, Europa League-ah Portuguese forward hi a chet chiat avangin United ṭantute beisei a sang kher lo ang. Amaherawhchu Ronaldo erawh Ronaldo a ni a, player danglam bik a nihzia lantirin Casemiro ball pek chu um lutin chakna goal khung nan a hmang.

Casemiro hian match fitness a nei lo tih a lang a, tih ṭhat a neih ang bawkin tihsual a ngah. Chutihrualin Brazilian midfielder hian Scott McTominay te neih loh a nei a, hun harsaaah pawh dam dapin ball a pe chhuak thei a, United-in an ṭhatpui zel a rinawm.

Hun tawp lamah Everton-in Dominic Calvert-Lewin luhtirin hun tawp lamah ball vawrhlutin na takin United an nawr a, Ten Hag-a'n substitute awmze nei a siam. Hun tawp dawna lut Raphael Varane chuan corner kick aṭanga ball lut ṭha zet chu Jordan Pickford-a tauh khalh a, United an him hram.