India U17-in Asian Cup 2023 an khel dawn

Mizo rawlthar Vanlalpeka Guite (Sentea) captain-na hnuaia khel India Under-17 chuan Asian Cup U17 2023 an khel dawn a, qualifier-a an match hnuhnung berah chak zo lo mah se Asian Cup khel tur hian an tling ta tho a ni.

India hian Pathianni zan khan qualification round thlengtu Saudi Arabia an hmachhawn a, 2-1 in an tlawm - mahse, Blue Tigers hian match hmasa pathumah Maldives (5-0), Kuwait (3-0) leh Myanmar (4-1) an hneh a, pahnihna ti ṭha paruk zinga an tel avangin Asian Cup khel tur hian an tling.

Pathianni zan inkhelah Saudi tan Talal Haji chuan goal hnih a khung a, goal khat zawk hi penalty aṭanga lut a ni - India tan Thanglalsoun Gangte chuan goal khat a khung ve a, mahse, hun pek belh a nih tawh avangin India tan comeback-na hun a awm lo.

India captain Sentea chuan, "Team ṭha tak tak nen group khata kan awm ho avangin kan result neih angte kha chu kan beisei ngam chiah lo. Mahse, kan inringtawk a, chak loa haw kha kan tum bik lo - chumi rah chu kan seng a ni.

"Kan game ṭhenkhat thlirlet khan, vanneihna tam tak kan nei tih a lang a, Pathian ṭanpuina leh kan tana lo ṭawngṭai ṭhinte vang liau liau a ni. Mizoram mipui, min lo thlawp a, min ṭawngṭaipui ṭhin zawng zawngte chungah India U17 chuan lawmthu kan sawi a ni," tiin Vanglaini a hrilh.

India squad-ah hian Khawzawl rawlthar Sentea bakah Bawngkawn winger Lalpekhlua leh Champhai midfielder Lalhmingchhuanga Fanai te chu squad-ah hian an awm a, hmun pawimawh an chang - Sentea hian inelnaah goal thum a khung.

Asian Cup U17 hi May, 2023-ah khelh tur a ni dawn a, inelnaa ti ṭha pali chu FIFA U17 World Cup 2023 khel turin an tling ang.