San Siro-ah Chelsea fiahin an awm dawn

Graham Potter hnuaia insiamṭhat hna thawk mek Chelsea chuan zanin dar 12:30 hian Champions League match khel turin AC Milan an lenchilh dawn a, Blues tan tlawm a thiang lo.

London club hi Premier League-a Wolverhampton Wanderers (3-0) hneh hlim an ni a, an phur vanglai tak a ni - Potter-a hnuaia an match hmasa berah RB Salzburg (1-1) chu inhnehtawkpui mah se match thum chhung a zawnin an chak tawh.

Blues-in Potter-a hnuaia an hneh zingah AC Milan (3-0) an tel a, mahse, an intawnna hmasa erawh Stamford Bridge a ni a, zanin an inkhelhna tur chu San Siro a ni - boruak a danglam ang.

Chelsea inrem dan
Potter-a'n Chelsea a zawm hma pawhin squad siksawi a ching a, Wolves lakah pawh Crystal Palace (2-1) laka chak team aṭangin player pasarih ngawt a thlak danglam a, zanina Milan hmachhawn tur team pawh hriatthiam a harsa.

Mahse, Potter-a'n a thutlukna chhanhim turin result a nei ṭha a, "Player 11 nen chauh kan hlawhtling thei lo," tiin a thutlukna a sawifiah bawk - zaninah player a rawn siksawi leh nual a nih pawhin mak tih tur a ni lo.

Wolves laka bench-a awm Reece James chu bul ṭan chiang tura beisei a ni a, match lia goal hnih khungtu Pierre-Emerick Aubameyang, Raheem Sterling leh Mason Mount te tlarhmaa an inkawp chuan Milan tan hna a awlsam lo ang.

Milan beiseina
Group E-ah team an intiat tawk hle - hmahruaitu RB Salzburg hian point nga an nei a, Chelsea (4 points), Milan (4) leh Dinamo Zagreb (3) ten an dawt avangin vawi khat chetsual hi team tin tan a pawi thei.

Hei vang hian zanina Chelsea leh Milan inkhel hi last 16 lut tur thui taka hril theitu a ni dawn a, club pahnih tan chetsual a thiang lo - Italian champion hi Chelsea an ngam loh hnuah khan an insiamṭha leh tawh a, Serie A lamah 2-0 in Juventus an hneh.

Milan tan Olivier Giroud chu hmatawngah awm leh tura ngaih a ni a, amah thlawptu tur Rafael Leao leh Brahim Díaz te hi Chelsea tlarhnung buaina thlen turin an ṭha tawk - chak ngei an tum ang.