A chung berah Barca an awm leh ta
Barcelona-in La Liga-ah an khelh ṭhat an chhunzawm zel a, Real Madrid-in table chung ber an luah chhung chu zan khat atan bak an rem ti lo - Pathianni zan khan an mikhual Celta Vigo chu 1-0 in an hneh a, table chung ber an luah leh ta.
Catalan club tan Pedri chuan inkhela goal awmchhun a khung a, Robert Lewandowski chuan inkhel bul ṭan mah se goal a khung lo - league match ruk zet a zawna goal a khung hnuah goal a khung lo ve teh tlat!
Barcelona hian league match riat an khelhah tlawm an la nei lo a, match riat aṭangin point 22 an nei. Real Madrid nen an point hmuh zat a inang a, mahse, goal difference avangin Barca hian table chung an luah.
La Liga min hmuaktu hi nghahhlelhawm chu a ni ta - La Liga match an khelh leh hmasak berah team pahnih an intawng dawn a, October 16 zanah El Clasico kan hmu dawn.
Rawlthar duhawm Pedri
Barcelona tan Ferran Torres chuan inkhel ṭantir lamah chance duhawm nei nghal mah se, Manchester City forward hlui hian goal-ah a chantir thei lo a, tun season La Liga-a a vawi thum nana bul ṭan ve chauh forward hian Xavi lawmna a thlen thei lo.
Minute 17-na a ni a, kum 19 mi Pedri-a'n a chance neih a hlah ve lo - amah ang thoa rawlthar ṭhangduang Gavi ball cross chu Unai Núñez chuan lo dang perin, Pedri ke bulah tak a tla a, Spanish midfielder hian goal-ah a lo chantir.
Pedri hian tun season La Liga-a goal hnih a khungna chiah a ni a, a goal khung tur cross-tu Gavi hi kum 18 mi a ni - kum 20 pawh an la tling lo chungin European club ṭha zingah anni pahnih duh lo hi an awm kher lo ang.
Barca tana thil mak danglam ve tak chu Lewy-a goal khung loh kha a ni - Celta an hmachhawn hmaa league match sariha goal kua khung tawh striker hian league match hmasa bera Rayo Vallecano an hmachhawn ṭum tih lohah chuan goal a khung zel a, Celta lakah a khung lo leh ta.
Siamṭhat ngai
Barcelona-in hnehna an chang a, chutihrual chuan an vannei tih an inhai bik lo ang - Catalan club hi Champions League-ah thih leh dam karah an awm tawh a, Nilaini zanah Inter Milan an mikhual ang a, Pathianni zana h league match khel tura Real an lenchilh zui dawn avangin insiamṭhat an mamawh.
Nou Camp-a inkhel an ni chungin Barca-in inkhel an thunun lo - mikhual team Celta tan Jorgen Strand Larsen chuan si phurh a sutah a inngai a, mahse, offside vangin pawmsak a ni lo.
Celta legend Iago Aspas-a'n a chance neih duhawm a chhawr lo a, Goncalo Paciencia chuan post a tih per bawk - league mawng lama awm Celta Vigo vanneih zan a ni lo tih a lang.
Barca fans tan lawmna tur erawh a awm - point thum an hlawh piah lamah goal an chhuah lo a, tun season-a league match riat an khelh tawhah goal khat chiah an la chhuah a, season hmasa nena khaikhinin tlarhnung lam an insiamṭha hle tih hmuh turin a awm.