ISL-ah goal ruk a lut!

Pathianni zan khan Indian Super League inkhel hmuhnawmah Hyderabad FC leh Mumbai City FC an intawng a, team pahnihin goal thum ve ve khungin, 3-3 in an inhnehtawk!

Shree Shiv Chhatrapati Sports Complex, Pune-a inkhelah Mumbai-in goal an khung hmasa zawk a, minute 23-na lekah Hyderabad defender Chinglensana Singh chuan Bipin Singh-a ball cross chu an lamah a tilut.

Mahse, Hyderabad an hnufual rei lo. ISL player man to ber Lalengmawia Ralte chuan penalty area-ah Bartholomew Ogbeche chu titluin penalty a chawi a, Joao Victor chuan si phurh sutin goal-ah a chantir.

Second half-ah pawh team pahnih an inngam tawk hle - Halicharan Narzary chuan minute 51-naah Hyderabad tan a khung ve leh a, 2-1 niin team pahnihin goal an inkhung chhawk zak zak a ni ber.

Hyderabad hlim chhung erawh a rei lo - season hmasa lama Jamshedpur chhuanvawr Greg Stewart cuan minute 67-naah Mumbai tana a goal hmasa ber khungin si phurh a sut ve leh a, mahse, Mumbai an phur tak tak hmain Victor chuan minute 76-naah a khung ve leh!

Hun tawp nan minute nga chiah a awm tawh a, champion lai Hyderabad an chak mai dawn niin a lang hman - mahse, bench aṭanga luhtir Alberto Noguera chuan ngaingam loin Mumbai tan si phurh a sut leh a, 3-3 a team pahnih inhnehtawkin point an insem.

Hyderabad lamah Mizo player inlan an awm lo a, Mumbai tan erawh Apuia bakah Lallianzuala Chhangte ten inkhel bul an ṭan.

October 9, Pathianni Zan
Hyderabad FC 3 - 3 Mumbai City FC
HYD: Joao Victor 45+4'(P), 77'; Halicharan Narzary 51'
MUM: Chinglensana Singh 23' (OG); Greg Stewart 68'; Alberto Noguera 85'