Barcelona tan tlawm a thiang tawh lo
La Liga hmahruaitu Barcelona-in Champions League-a an match hnuhnung berah Inter Milan chu 1-0 in an ngam lo a, inkhelh zawhah coach Xavi chuan, "Final pathum kan hmabak ta," tiin a sawi.
Chumi awmzia chu Barca tan last 16 lut turin hmabak match thumah chak vek a ngai tihna a ni a, zanin dar 12:30 hian Inter Milan an mikhual dawn - Barca tan tlawm a thiang tawh lo.
Catalan club hian an match hmasa berah 5-1 ngawtin Viktoria Plzen sawp mah se, Bayern Munich (2-0) leh Inter (1-0) an ngam lo zui a, dinhmun derthawng takah an din phah.
Hetihlai hian Bayern Munich chuan group C-a match thum an khelh tawhah hnehna an chang vek a, zanin dar 12:30-ah vek Viktoria Plzen an mikhual ang - hnehna an chan chuan last 16 lut ang hiala sawi theih an ni dawn.
Dinhmun a derthawng
Nipui transfer-a club share ṭhenkhat hralh chunga risk la Barca-in La Liga lamah chuan an la tifuh rih a, league hmahruaitu an ni mek. Mahse, Catalan club hian kum 2015 hnua an la champion leh lohna Champions League-ah erawh lei rem an la rap thei lo.
Barca hian zaninah Inter an ngam lo leh a nih ngat chuan Champions League an mangṭha thei ang - Inter hian Barca hneh ta se, point kua an nei dawn. Catalan club-in a hnu match hnihah hnehna chang se, Inter hi tlawm ve ve pawh ni se an point hmuh zat a inang ang.
Champions League-ah head-to-head en a ni a, point hmuh zat inangah Barca aiin Inter an tlang zawk dawn tihna a ni - Barca tlawm ta se, beisei la nei tur chuan Bayern-in Viktoria Plzen an hneh loh a ngai.
Mahse, Viktoria laka Bayern tlawm tur chuan thil mak a thlen a ngai a, a tawi zawnga sawi chuan Barca-in an hmabak chingfel turin midang kuta an innghah a rem lo - zaninah chak an mamawh.
Barca buaina
Celta Vigo laka chak hlim Xavi-a'n Celta laka bench-a a dah Ousmane Dembele, Ansu Fati, Sergi Roberto leh Eric Garcia te bul a ṭantir a beiseiawm a, midfield-ah Pedri chu bul ṭan ngei tura ngaih a ni a, Frenkie de Jong a dam leh tak avangin Gavi emaw Sergio Busquets emaw chu bench-ah an awm a rinawm.
Tlarhmaah Dembele leh Fati ten Robert Lewandowski an thlawp thei dawn. Mahse, Barca tan buaina tur pakhat a awm a, an match hnuhnung pahnihah goal khung khawl Lewy-a'n goal a khung lo!
Hei chauh a ni lo - Lewy hian Champions League-ah Viktoria laka hattrick a siam tih loh chu goal khung a la nei lo a, zaninah Polish striker tan amah seltute chhanlet a ṭul.
Barca hian kartawpah El Clasico khel turin Real Madrid an lenchilh dawn tih hriat tel a ṭha a, Xavi-a tan inkhel pawimawh pahnih a inhnaih mah mah - zanina a player rem dan tur hriat a châkawm ta hle.
Inter beiseina
Serie A lamah Inter Milan-in beisei phak lo mah se Champions League lamah Bayern an ngam loh hnuin, a zawnin match hnih hnehna an chang tawh a, San Siro-a an hneh hnu Barca hi Nou Camp-ah pawh an hlau lo ang.
Inter hian Barca an hneh hnuah khan Sassuolo chu 2-1 in an hneh a, hemi hma hian Serie A match hnih a zawnin an tlawm - Simone Inzaghi naute hi an insiamṭha ṭan tih a lang a, Barca tan mikhual an châkawm lo tih a chiang.
Striker inhliam Romelu Lukaku-a'n dam lam a pan nia sawi a ni a, squad-ah a awm a nih pawhin bul erawh a la ṭan kher lo ang. Mahse, Italian club hi Edin Džeko leh Lautaro Martínez neitu an ni a, tlarhma hi manganna tur niin a lang lo.
Midfield-ah Hakan Çalhanoglu hi en bik tur zingah a tel leh ang a, Sassuolo laka bench-a awm Henrikh Mkhitaryan pawh bul ṭan tawh tura beisei a ni - meng rei turin lo inbuatsaih phawt mai rawh!