Luis Diaz a chawl rei dawn

Liverpool forward Luis Diaz chu a khup hliam avangin December thleng a chawlh a ngai dawn niin a lang a, Liverpool fans tan tun season-ah chanchin lawmawm hriat tur a tlem hle.

Reds player Joel Matip leh Trent Alexander-Arnold pawh hliam vangin kar engemaw zat an inlan thei dawn lo a, Liverpool fan-te tan rimawi a ni lo.

Merseyside club hian Pathianni zan khan league match-ah hmahruaitu Arsenal an lenchilh a, 3-2 a an tlawmna inkhelah hian Diaz, Matip leh Trent te hi hliam vanga lakchhuah an ngai vek.

Colombia inter-national Diaz hliam hi Thawhṭanni khan enfiah nghal a ni a, a khup hliam hi zai kher ngai dawn lo mah se World Cup zawh hma chu a inlan theih tawh rih loh tur thu tarlan a ni.

November 20-ah World Cup khelh ṭan a ni dawn a, November 13-ah Premier League an chawl dawn - hemi hma hian Reds-in inelna hrang hrangah match 10 an khel dawn.

Diaz hi mak taka a rawn dam thut a nih loh chuan match 10 tal chu a chawlh a ngai dawn tihna a ni a, December 26-a Aston Villa an hmachhawn hunah a rawn kir ve leh thei chauh ang.

Kum 25 mi Diaz hian tun season-ah Liverpool tan inelna hrang hrangah match 12 khelin goal li a khung a, assist vawi thum a nei bawk - Reds tan player pawimawh a ni.

Defender inhliam ngun ve tak Joel Matip chu chawn hliam vangin kar hnih emaw kar thum emaw a chawlh a ṭul dawn a, Alexander-Arnold chu ke rek hliam vangin kar hnih vel a chawlh a ṭul dawn bawk.

Liverpool hian Juven-tus aṭanga loan-a an hawh Arthur Melo chu thla thum/li an chhawr thei dawn lo tih a chiang tawh bawk a, Naby Keita leh Alex Oxlade-Chamberlain chu hliam vanga chawl mek an ni.

Reds hian zanin dar 12:30-ah Champions League match khel turin Rangers an lenchilh dawn a, Premier League-a an mualpho thawi dam nan chak an tum ang - match thum an khelh tawhah point ruk an nei mek a, group A-ah awmin pahnihna an ni mek a, hmahruaitu Napoli chuan point kua an nei thung.