National Games boxing final-ah Mala Kan chakna Lalpa - Faka, boxing coach

Nimin khan National Games 2022 boxing semifinal chu Mahatma Mandir Venue 3, Gandhinagar-ah khelh a ni a, Mizo tlangval Malsawmtluanga chuan Goa boxer Pushpender Ashok Rathee chu unanimous decision (5-0) a hnehin middleweight-ah final a lut.

Gold medal inchuhna hi vawiin chhun dar 12:00 hian neih a ni dawn a, Maharashtra boxer Nikhil Premnath Dubey nen an inhmachhawn ang.

Featherweight semifinal-ah erawh Lallawmawma'n Services boxer Mohemmed Hussain a hneh lo. Boxing-ah hian mipa pathum leh hmeichhe pahnih an kal a, medal pahnih an la dawn. Lawmawma'n bronze medal a la tawh a, Mala'n gold emaw silver emaw a la la thei bawk.

Lawmawma tan bronze
Tuipui boxer Lawmawma hian nimin khan featherweight (54–57 Kg) semifinal-ah Services boxer Mohemmed Hussain a hmachhawn a, unanimous decision (5-0) in an hneh lo.

Result thlir mai chuan Lawmawma hi chak lo chiang viauin lang mah se ring chhungah erawh boxer pahnih hi an intluk tawk. Round tawp berah phei chuan Lawmawma hi chungnung zawkin a lang a, judge-te erawhin Services boxer hi round tina che ṭha zawkah an ngai thung.

Lawmawma hian final a thlen zawh tak loh avangin bronze medal-ah a lungawi a ṭul a, medal lak phak hrim hrim hi chanchin lawmawm a ni. Medal la tur hian Lawmawma hian first round-ah Rajasthan boxer Jitendra Choudhary chu unanimous decision (5-0) in a hneh a, quarterfinal-ah erawh Himachal Pradesh boxer Ashish Kumar chu split decision (3-2) in a hneh leh bawk.

Mala a thiam
Lunglei Electric tlangval Mala'n Goa boxer Pushpender hmaah a thiam thil a pholang a, round khatna aṭangin a thunun zawk. Pushpender hian hnek chhuak tam mah se Mala hian a hun takah hnek chhuakin point hmu zawkah a ṭang zel.

Round hnihnaah phei chuan Mala'n a hnek fuh chian avangin referee-in a 'count' hial a, round thumnaah phei chuan a hnek tlu bawk. Pushpender ding tluan mah se Mala a chak dawn tih a chiang a, judge thutlukna a chhuah chuan unanimous decision (5-0) in a chak.

Mizoram boxer-te hi coach pahnih Lalfakzuala (SYS), Chanmari Lunglei leh B. Lalhriatpuii, Nursery ten an hruai. Faka chuan, "Kan chakna Lalpa. Pathian zarah final kan thleng a, lawmthu sawi kan ba nasa a ni. Mizo mipuite min ṭawngṭaipui turin kan sawm che u," tiin Vanglaini a hrilh.

Mala khingpui tur Maharashtra boxer Nikhil hian Rajasthan boxer Pritesh Bishnoi (4-1), Delhi boxer Buntee Singh (5-0) leh Services boxer Sumit (4-1) te a hneh. Mizo boxer hian final thleng tur hian Gujarat boxer Sahil Aslambhai Nilgar, Uttarkhand boxer Pankaj Kumar leh Goa boxer Pushpender te chu unanimous decision vekin a hneh a ni.