Chanmari FC-in coach atan Mala an lalut

Mizoram Premier League vawi hnih champion tawh Chanmari FC chuan nimin tlai khan coach Rochhingpuia nen an inṭhen thu an puang a, coach atan MPL-a Aizawl FC champion pui tawhtu K. Malsawmkima an lakluh thu an puang.

MPL awm hnua tualchhung football-a sulhnu nei ṭha ber zinga mi Chhinga hian tun season aṭangin Chanmari FC a enkawl a, hemi hma hian Tata Trusts Centre of Excellence, Mualpuiah coach hna a chelh tawh.

Chanmari FC chuan, "Coach Rochhingpuia nen tun season atan kan inṭha ṭhen rih a, kan thawhho leh thuai kan beisei e," tiin thuchhuah an siam. Chhinga hnuaiah Chanmari FC-in beisei an pha lo a, champion tuma season bul ṭan CFC hian match ruk aṭanga point ruk chauh an hmuh avangin thutlukna harsa tak hi an siam ta a ni.

Nimin tlai khan RG Stadium-ah Chanmari FC coach thar Mala hian training a ṭan nghal. Nimin chawhma lamah Lalramchullova chuan, "The real boss is back," tiin whatsApp status a nei a, Mala'n CFC a kaihruai dawn tih a hriat theih.

Mala hian Chullova hi FC Kulikawn aṭangin Luangmual FC-ah a hruai a, Aizawl FC-ah chhawm zelin MPL best player a nih hial bakah Mizo club hi I League-ah a champion pui bawk.

Chanmari coach thar Mala hi Mizo coach zinga tawnhriat nei ṭha ber zinga mi a ni a, a enkawl player-te ngainat a hlawh ṭhin hle. Leitan club RC FC enkawlin third divison leh second divison a champion pui hnuah first division kai puiin I Day Football (2009) leh MFA Cup-ah a champion leh bawk.

Mala hian FC Kulikawn a enkawl a, MPL ṭan hma khan Serchhip-ah L&L Tournament-ah champion mah se an khelh ṭhat tawk loh avangin an ban. MPL2-ah Mala hian Luangmual FC enkawlin final hial a thlenpui a, amaherawhchu Chanmari FC lakah an tlawm.

Luangmual FC ṭantute an chak loh danah an lawm lo a, fan-ten khelmualah ṭhutna an paih avangin MPL aṭanga paihchhuah an ni. Aizawl FC-in remchangah lain Mala hi an lalut.

Mala hian Aizawl FC-ah pawh record duhawm hi a chhunzawm a, MPL3-ah a vawi khat nan AFC hi a champion pui bakah nomawi chawi theih dang MFA Super Cup leh I Day Football-ah te an champion.

Kum 2015 khan Mala hian Aizawl FC chu I League 2nd Divison-ah a champion pui a, Mizo club-in I League an khelh theih phah. National Games-ah pawh Mala hian Mizoram team a enkawl a, a vawi khat nan Mizoramin football-ah gold medal an la bawk.

I League club enkawl turin Mala hian licence a nei lo a, hemi a nih avang hian Aizawl FC academy a enkawl chhunzawm. Mala hnuaiah hian first division leh MFA Cup-a an champion bakah an la champion ngai lohna MPL Under 18-ah an champion a, a record hi a ṭha hle.

Chanmari FC coach thar Mala chuan, "Training ka neih pui a, ka naute dinhmun hriat nan ka inkhelhtir chhin a, an ṭha khawp mai. An movement a ṭha a, an khel hmuh a nuam. Football club ka enkawl lohna a rei leh deuh tawh a, mah se result ṭha tak kan neih theih ka ring. Police hi kan hmachhawn hmasak ber tur an ni a, hneh ngei kan tum dawn a ni," tiin Vanglaini a hrilh.

October 14, Zirtawpni zan dar 7:00 hian Chanmari FC leh Mizoram Police FC te an inkhel dawn a, Mala boruak vangin inkhelin ngaihven a hlawh sawt ang.

Chhinga hnuaia Chanmari Record
Chanmari FC hian Rochhingpuia hnuaiah hian I Day Football 2022 bakah MPL9 round ruk an khel hman. I Day Football-ah hian Chanmarians hian group stage-ah point li hmu mah se Chhinga Veng (6 pts) leh Mizoram Police (4 pts) te tluk loin group stage an paltlang lo. Chanmari hi match thumah hian chak, chak lo leh inhnehtawk an nei vek a, goal ruk khung mah se goal riat an chhuah.

MPL9-ah Chanmari hian match ruk an khelh tawh aṭangin Electric Veng FC leh FC Bethlehem chauh an hneh a, Mizoram Police hmachhawn hman lo mah se Chhinga Veng FC, FC Venghnuai, Aizawl FC leh Chawnpui FC te an hneh lo. Chanmarians hian MPL9-ah goal nga an khung a, goal 12 an chhuah thung.

Chhinga hnuaiah Chanmari hian match kua an khel a, vawi thum an chak a, vawi nga chak loin vawi khat an inhnehtawk. Match kuaah hian goal 11 an khung a, goal 18 an chhuah a ni.