Spurs tan chak a ṭul

Zanin dar 12:30 hian Tottenham Hotspur-in Eintracht Frankfurt an mikhual dawn. Champions League group D-ah Spurs leh Frankfurt hian point li ve ve an hmu a, pahnihna leh pathumnaah an awm avangin zanin inkhel hi a pawimawh hle.

Kar liam ta khan Deutsche Bank Park-ah English club leh German club te hi goal awm loin an inhnehtawk tawh. Hemi ṭum hian kum 38 mi Japanese defender Makoto Hasebe chuan Harry Kane a veng ṭha a, second leg-ah pawh Hasebe leh Kane te hi en hlawh tur zinga mi an ni.

German club Frankfurt hi season liam taa Europa League champion an nih avangin dah hniam chi an ni lo a, UEFA hnuaia inelna hnuhnung pakuaah vawi khat chiah an chak lo. Eintracht boss Oliver Glasner chuan, "First leg-ah khan thil hmuh ka nei a, lo zirchiang turin ka naute ka hrilh," tiin a sawi. Second leg-ah Frankfurt-in ruahmanna thar an nei dawn a, Antonio Conte hote an inpeih a ṭul ang.

Frankfurt hian Bundesliga-ah VfL Bochum chu 3-0 zetin an hneh lo a, Glasner hote hian UCL an ngaih pawimawh vanga player ṭha ṭhenkhat an hahchawlhtir vang a ni. Spurs erawhin Brighton & Hove Albion an hneh thung a, goal awmchhun hi Kane-a khung a ni. Italian manager Conte hoten an mualah hnehna chan ngei an tum ang.

Group D inkhel dangah hmahruaitu Sporting Lisbon-in Marseille an mikhual dawn. Portuguese club-in point thum an hlawhchhuah chuan knockout stage an lut dawn a, French club tan erawh knockout stage luh beiseina nei turin point hmuh ngei a ṭul thung.