A vawi khat nan Goa inkhel dawn

Indian Super League-ah tun season-a a vawi khat nan FC Goa an inlan dawn a, zan dar 7:30 hian East Bengal chu khualmualah an lenchilh ang - inkhel hmuhnawm a beisei ngam.

Goa hian Mizoram chhul chhuak, midfielder pahnih HP Lalremruata leh Ayush Dev Chhetri an kawl a, an kum a la nau deuh avangin bul an ṭan nghal lo a nih pawhin a mak lo ang.

Ayush Dev Chhetri hi Aizawl FC academy chhuak niin, Mizoram Premier League leh I League lamah pawh tawnhriat lo nei tawh a ni. HP-a hi Electric Veng FC tana MPL lo khel tawh a ni a, Goa reserve team lama a inzir hnuin, tun season-ah ISL a khel dawn.

FC Goa hian season hnih zet an club tana lo khel tawh Carlos Pena chu coach atan lalutin, Spanish coach hoin inelna an hmachhawn dawn.

Goan club tan Kerala Blasters aṭanga an lakluh, Espanyol striker hlui Alvaro Vazquez, Morocco international Noah Sadaoui, Spanish second division club Sporting Gijon aṭanga an lakluh Marc Valiente, Syria international Fares Arnaout, Spanish winger Iker Guarrotxena leh club captain Edu Bedia te an hmuhnawm ang.

India coach hlui Stephen Constantine enkawlna hnuaia khel East Bengal hian an match hmasa berah Kerala Blasters chu 3-1 in an ngam lo a, Kolkata club hian boruak an neih len avangin Goa laka an tlawm leh chuan fan-ten Constantine an kawh rawn ang.

Mizo player tam takin hming an lo chher tawhna East Bengal-ah hian defender Jerry Lalrinzuala leh Lalchungnunga te an awm a, Durtlang tlangval Chungnunga hian match hmasa berah bul ṭanin, Jerry hi bench aṭanga luhtir a ni thung.