Hmeichhe football inelna an ṭan

Khelo India U-17 Girl's Football League Mizoram 2022-23 chu nimin khan an khel ṭan. Inelna hi High Field Macdonald Hill, Zarkawtah neih niin - India captain armband hreng tawh Jeje Lalpekhlua'n a kick off.

Intihsiaknaah hian school paruk - Govt Mizo HS, Govt Central HS, Govt JL HS, Govt Hrangchhuana HS, Govt Aizawl East HS leh Kids Care School te an tel. School parukte an inkhel kual ang a, a sang pahnihin final an khel ang.

Jeje-a chuan FIFA U-17 Women's World Cup khelh turah, India player zingah Mizo hmeichhia an awm lo chu pawi a tih thu a sawi a, Khelo India U-17 Girl's Football League aṭang hian Mizo hmeichhiate tan football kailawn thar anih ngei a beisei thu a sawi tel bawk.

Sawi zawmin Jeje-a chuan, "Inkhel tur zawng zawngte duhsakna ka hlan. Khelo India U-17 Girl's Football League buatsaih thei zinga Mizoram Football Association a tel hi a lawmawm hle a ni," a ti.

Lawmman
Champion: Rs 50,000/-
Runners Up: Rs 30,000/-
Match Money: Rs 2,000/- (Match a piangin an dawng ang)