Forest leh Villa inhnehtawk

Nottingham Forest chuan Premier League table mawngphah an chhuahsan. Forest hian harsa takin Aston Villa lakah point khat an hlawhhchuak a, a hniam ber an nihna an kalsan theih phah.

Thawhṭanni zan Premier League inkhelah Nottingham Forest leh Aston Villa te 1-1 in an inhnehtawk. A zawna vawi nga tlawm tawh Steve Cooper enkawl Forest tan chuan point khat hlu tak a ni ngei ang.

Inhnehtawk
City Ground-a inkhelah, ball pet ṭan hma aṭangin fans thawm a ring. An result ṭha lo tak thaibo ngei an duh zia mipui lamin an thawm hmangin an puang chhuak a, player lam pawhin a tir aṭangin thapui an thawh nghal.

Minute 15-naah Emmanuel Dennis chuan goal a khung ta mai, Morgan Gibbs-White-a freekick aṭanga ball kal chu Villa defender te tih ṭhat tawk loh karah Dennis hian a khung fans lam thawm a ring hle.

Mahse, tun season EPL-a goal chhuah hnem ber Forest tlarhnung a phui thei lo. Minute 22-naah goal an chhuah ve leh nghal, yard 25-a hla aṭangin Ashley Young chuan si phurh a sut, kum 2011 hnua a goal khung lehna hmasa ber a ni.

Steven Gerrard-a enkawl Villa hian Ollie Watkins hmangin goal an khung leh a, mahse offside vangin an pawm lo. Ezri Konsa laka a chet danah Forest captain Ryan Yates chu penalty chawi turah an ngai a, mahse an beisei ang an pe lo - point khatah an lungawi a ṭul.

Remchang bawhpelh
Aston Villa khan hnehna chang se la chuan, point 11 hmuin league table-ah pakuana an ni hial ang. Amaherawhchu, goal an chhuah hmasak hnuah chhang let thei mah se, an goal hnihna khung turin an vannei tawk tawh bik lo.

Villa manager Gerrard chuan, "A pawimawh lai chu point kan hmu kha a ni, chutih rualin phu tak chunga point thum kan hmuh loh chang a awm ṭhin hi chu a pawi. Tun ṭumah pawh khan hun ṭha kan bawhpelh hnem hle.

"Kan squad en ila, Philippe Coutinho, Emiliano Buendia, Ollie Watkins, Danny Ings leh Leon Bailey te kan nei. Hliam leh harsatna vanga khelh rual theih loh chang chu a awm, chumi rual chuan tun aia thleng sang thei tur chu kan ni," tiin a sawi.

Forest coach Steve Cooper erawhin beisei a neih thu sawiin, "Match nga chhung result ṭha lo kan nei a, tunah chuan point kan hmu ta. Villa nen kan inkhel result aṭang hian thil ṭha lam kan thlir tur a ni ang," a ti.