Sum hmang hnem Bagan an chak lo

ISL-a sum hmang hnem ber pawl ATK Mohun Bagan chu tun season-a an match hmasa berah an tlawm nghal a, Chennaiyin FC lakah 2-1 in an tlawm.

Bagan tan Manvir Singh chuan minute 27-na lekah goal hmahruai a khung a, Salt Lake Stadium-a inkhelah Kolkata club-in harsatna nei loin hnehna an chang dawn niin a lang hman.

Mahse, Chennai club-in minute 59-naah penalty an hlawh chhuak a, ATK Mohun Bagan goalkeeper Vishal Kaith chuan bench aṭanga lut Kwame Karikari chu a titlu.

Ghanaian striker Karikari hian minute 63-naah penalty hi goal-ah a chantir a, ISL-a a match hmasa berah goal a khung nghal - season hmasaa Thai top flight club Nakhon

Ratchasima tana goal 17 khungtu hi a hming kan lam nawn fo a rinawm.

Hun tawp nan minute sarih chauh a awm tawh tihah Karikari hian Rahim Ali tan a siamsak a, Indian striker ṭhangduang hian chkana goal ni turin a khung zui.

Bagan tan Liston Colaco chuan freekick aṭangin chance nei leh mah se Bagan keeper hlui Debjit Majumder chuan ṭha zetin a dansak a, 2-1 in Chennaiyin an chak.

Kolkata club tan Lalrinliana Hnamte chu bench-ah a awm tluan a, Chennaiyin lamin Mizo player kawl an nei lo thung.

Bagan coach Juan Ferrando chuan, "Goal kan chhuah chiah hian player-ten inrintawkna an hloh a, chu chuan pass sual leh chance chhawr lohah a tlak mai ṭhin. Hetiang hunah hian thil thleng chu football-a thleng ve ṭhin reng a ni, tih player-te hrilh an ngai a, chutihrual chuan kan tihsualte siam ṭhat dan tur zawn a ṭul bawk," a ti.

Chennaiyin coach Thomas Brdaric chuan, "Kolkata-a chak theih hi kan tan chuan a hlu a ni," a ti a, ISL season bul an ṭan danah a lawm.

October 10, Thawhṭanni Zan
ATK Mohun Bagan 1 - 2 Chennaiyin FC
AMB: Manvir Singh 27'
CHE: Kwame Karikari 63' (P); Rahim Ali 83'