Atletico khelmual pawn buaina a fel, khelmual chhung chinfel a ṭul
Atletico Madrid chuan Barcelona aṭanga loan hmanga an laklet Antoine Griezmann chu a nghetin an lalut a, French forward hian kum 2026 thleng daih contract a nei. Diego Simeone-a'n a duh hun takah Griezmann a luhtir thei tawh dawn a, tunah chuan khelmual chhung buaina chinfel a ṭul ang.
Champions League-ah Atetico hian match thum aṭangin point thum an hmu a; FC Porto leh Bayer Leverkusen nen point hmuh zat a inang. Group B-ah hian club lar lo ber Club Brugge-in point kua an hmu tawh a, club dang pathum dinhmun a ṭha lo.
Zanin dar 10:15 Metro-politano Stadium-ah Atletico-in Club Brugge an mikhual dawn a, Spanish club hian knockout stage khelh an tum a nih chuan chak ngei an mamawh. Inkhel dangah Bayer Leverkusen-in FC Porto an mikhual dawn a, zanin dar 12:30-ah an khel ang.
Leverkusen hian coach atan Liverpool legend Xabi Alonso an lalut a, Spanish manager hnuaia an match hmasa berah Schalke 4-0 in an sawp. Alonso-a'n Bundesliga-ah bul an ṭan ṭha a, Champions League-ah fiahin a awm zui dawn.
Buaina chu
August 2021 khan Atletico-ah Griezmann a kir a, season khat chhung atan loan-in a zawm phawt a, a loan hun hi kum khat dang pawhsei theiha tih niin, Atletico hian euro maktaduai 40-a a ngheta an lak theihna dan ziah tel a ni bawk.
Mahse, he contract-ah hian a hunlaia vantlang hriata puanzar ni lem lo ziah tel a awm a, chu chu Griezmann hian Atletico-ah match khelh tur an neiha 50% ah minute 45 aia tam a khelh chuan Madrid khaw club hian €40mtd-in an lei ngei ngei a ṭul dawn.
Season hmasa khan Griezmann hian Atletico match 80% ah minute 45 aia tam a khel a, tun season-ah hetiang bawka a khelh leh chuan Atletico tan €40mtd insen ngei a ngai dawn.
Atletico hian Griezmann hi Barca-ah thawn kir pawh ni se, Catalan club hian an mamawh lo a, man to taka hralh a harsa tawh dawn bawk - hei hi Atletico chuan an hre reng a, French forward hi an lum tam tir duh lo.
A bul ṭantu
Barcelona an lungawi lo a, court-ah kal an tum nia sawi a awm - mahse, he buaina hi ngun taka en chuan Catalan club hi an thiam lo hmasa zawk niin a lang a, Griezmann chungchanga Atletico nena an indawrna hmasaah an rinawm tlat lo.
Catalan club hian July 2019 khan Atletico aṭangin Griezmann hi a release clause pound maktaduai 107 in an lei a, mahse, he inremnaah hian Atletico an lungawi lo a, Barca leh Griezmann te chu French forward release clause a tlakhniam hmain an inrem hman tawh niin an sawi.
Atletico sawi dan chuan Barca hian an player hi a rukin inremna an lo neihpui vek tawh a, hetihlaia Griezmann-a man zat chu pound maktaduai 179 a ni. Mahse, French forward an lakluh thu puang turin a release clause tlakhniam hun an nghak a, £107mtd-in an lei ta daih!
Hetihlai hian Atletico chuan, "Griezmann-a man a tlakhniam hma khan player leh Barca hi an lo inrem tawh ngei a, chuvangin Barca-in pawisa min pek zat hi a dik lo a ni," an ti a, Barca chuan an contract-a an ziah dan enchiang mai turin Atletico hi an lo hrilh.
Atletico an chak
Griezmann hian June 30, 2024 thleng Barcelona-ah contract a la nei a, Catalan club-ah hian kum khatah €38mtd a hlawh bawk - Barca tan chhawr loh tur player tan season khata heti zat la sen hi uiawm tak a ni.
Chuti a nih chuan Barca tan a thlawna chhuahtir mai pawh a hlawk zawk thei dawn tihna a ni a, chutihlaia €40mtd lo sen ṭalh hi Atletico tan thil âtthlak tak a ni ve thei tlat. Mahse, Barca hian Atletico aṭanga sum ṭhahnem tak lakchhuah an tum.
Amaherawhchu Atletico an ṭang rei thei ta zawk a, Griezmann an lak lehna man zat tak puang lo mah se Barca beisei zat aiin an lei tlawm. Khawthlang media ṭhenkhat ziah danin Atletico hian Barca beisei zat €40mtd chanve chauh an pe niin an ziak.
Kum 31 mi Griezmann hi France-in 2018 World Cup an champion khan player pawimawh a ni a, Atletico tan pawh match 304-ah goal 144 khungin goal khung tam palina a nih phak bakah Europa League, Spanish Super Cup leh UEFA Super Cup te a champion pui tawh bawk a ni.