Tlai dar 3:00-ah Aizawl FC Vs Chanmari FC; Lammuala Romanian midfielder Andrei inlan hun
Leitlangpuiah Romanian midfielder Andrei Ionescu phochhuahin a awm tawh a, Aizawl FC midfielder hi Mizoram champion lai Chanmari FC hmaah vawiin tlai dar 3:00 hian fiahin a awm dawn.
AFC player thar Andrei bakah Afghan defender Masih Saighani vangin Lammual inkhel tur hian tualchhung football ngainatute a tiphur a, MPL ngaina chin chuan result-in team dinhmunah nghawng lian tak a neih theih avangin inkhel en ngei an tum thung dawn a ni.
Chanmari FC hi pahnihna ni mek mah se an point hmuh zat 12 chu pathumna Bethlehem Vengthlang pawhin an hmu a, Aizawl FC nen an inkarah point hnih chiah a awm - table mawngphaha awm Chanmari West pawhin point riat an hmu tawh. MPL champion lai Chanmari aṭanga table mawngphaha awm team-te hian semifinal an la beisei vek a, relegate thei an la ni vek bawk.
13-10
Aizawl FC leh Chanmari FC te hi vawi 25 an inhmachhawn tawh a, I League club hian vawi 13 hnehna changin Chanmari hi vawi 10 an chak tawh thung.
MPL club lian pahnihte hi vawi hnih chiah an la inhnehtawk a, an intawn hnuhnun ber ṭum chu MPL6 phase 1 kha niin 1-1 in an inhnehtawk.
Zin chau
Chanmari FC-in Lungleia hmahruaitu Chhinga Veng an hneh loh hnuin Pune an pan nghal a, Thawhṭan zana ISL club FC Pune City an hmachhawn zawh hnuin Thawhlehni khan Aizawl an rawn thleng.
Veteran coach H. Vanlalthlanga chuan, "Kan zin tam avangin kan chau tih chu zep rual a ni lo a; amaherawhchu ni khat hahdamna hun ṭha kan nei a, kan rilru lam a phur avangin ṭha takin kan khelh theih ka ring. Pune-a kan zin kha hlawk thlak kan ti a, thil tam tak kan hriat phah a, chona thar kan nei a ni," tiin AFC lakah theihtawp an chhuah tur thu a sawi.
Mi thar
Chanmari FC hian FC Pune City nena an inremna angin Lungleia an zin hma khan Gani Ahmed leh Surjit Hossein-te enchhin turin an chhah chho a, coach Thlanga chuan player pahnih hi chhawr tlak an nih thu Vanglaini a hrilh.
Aizawl FC an hmachhawn hunah midfielder Surjit Hossein-a'n inkhel bul a ṭan a rinawm a, forward Gani Ahmed pawh minute 90 chhung chuan a inlan ngei beisei a ni. Heng player pahnih hi Pune-ah an zin ve lo a, keeper F. Lalmuanawma te nen tha tharin I League club an hmachhawn thei ang. Captain Rochhingpuia erawhin AFC C Licence course a kal avangin chhawr theih a la ni dawn lo.
AFC lam hi
Ṭhuamluaia Mualah Aizawl FC-in Lammuala 6-1 zeta an sawp Mizoram Police lakah goal hnih khung hmasa mah se an hum zo lo a, point khat chauh hmuin Aizawlah an rawn kir. AFC hian Lunglei mipui lakah I League champion theihna an pho chhuak zo lo a, amaherawhchu Romanian midfielder Andrei thiamzia erawh a taka hmuh a ni.
Andrei hian goal nena bul a ṭan avangin Lammualah tlangnel takin a khelh theih nghal a rinawm a, Afghan defender Masih Saighani erawh enfiah a la ṭul thung. Germany-a hun rei tak khawsa tawh Saighani ṭhatna hmuh tur a awm a, amaherawhchu Aizawl FC tlarhnung a la phui lo a, Chanmari an hmachhawn hunah team anga an khelh a ṭul dawn a ni.
Aizawl FC coach Paulo Meneses chuan, "Inkhelh laiin inhrilh reng theih a ni lo a, Lungleiah khan ka nauten ka thusawi an zawm tawk lo a ni. Tlarhnung pawp rem phui hi a ṭul a, hei hi kan hna hmasa tur a ni. Chanmari FC hi team ṭha tak an ni a, chutihrualin an zin chau tih kan hria, hman ṭangkai ngei kan tum ang," tiin Vanglaini a hrilh.