Reds-in goal surtir
Liverppol chu English club zingah European football-a khualmuala chak chiang ber an ni. Thawhlehni zan Champions League inkhelah Reds hian Slovenian chu Maribor chu 7-0 in an va luhchhuah.
Ljudski vrt, Maribor-a inkhelah Reds tan Roberto Firmino leh Mohamed Salah ten goal hnih ve ve an khung bakah Philippe Coutinho, Alex Oxlade-Chamberlain leh Trent Alexander-Arnold ten goal khat ṭheuh an thawh bawk.
Leeds United (1969) leh Manchester United (1957) ten khualmualah si ruk faiin hnehna an lo chang tawh a, club pahnihin record inṭawm an neih hi Liverpool hian an rawn khum chiah a ni.
Liverpool manager Jurgen Klopp chuan, "Inkhelh zawh hnuah khan record kan siam thu min hrilh chiah a, match kan khelh hma kha chuan ka hre lawk lo a ni. Hun rei tak chhung record lo awm tawh khumin mellung pawimawh kan phun thei hi ka lawm hle, si sarih faia kan chak thei a nih chuan kan khel ṭha vek tihna a ni," tiin a sawi.
Reds hian an match hmasa pahnihah Sevilla leh Spartak Moscow te an inhnehtawk pui a, tun dinhmunah point nga hmuin group hmahruaitu an ni. An group-a inkhel dangah Spartak-in an mualah Sevilla 5-1 in an hneh a, Russian club hian Reds point hmuh zat an hmu a, Sevilla hian point li an hmu tawh bawk.