Semifinal luh hi kan tum hmasak ber a ni - Sanga

Chhinga Veng coach Lalsangzuala Hmar-in Mizoram Premier League Season 6-a semifinal lut hmasa ber nih a tum ruh a, zanin dar 7:30 hian Lammualah Chanmari West FC an hmachhawn dawn.

Chhingcows hian Sanga kaihhruaina hnuaiah match 20 chhung khel tawhin hneh loh an la tawng lo a, hemi kawngah West Warrior hi vawi thum hmachhawn tawhin an hneh vek bawk.

Chhinga Veng coach Sanga chuan, "MPL-ah league round khelh ṭhat vangin a champion theih loh a, kan inbeihna hmasa chu semifinal thlen a ni. Hei vang hian kan tum hmasak ber chu semifinal thlen a ni a, point thum kan hmuh leh chuan knockout stage chu kan thleng tawh turah ka ngai," tiin Vanglaini a hrilh.

Chhingcows hian West Warrior vawi thum an hmachhawn ṭumah hian goal 13 an khung a, goal khat chauh an chhuah. Sanga chuan, "Kan inkhelh tawhna aṭanga chak tawha kan inngai a nih chuan kan tisual khawp ang. Chanmari West hian tun hnaiah result nei ṭha lo mah se khelmualah erawh an khel ṭha a, fimkhur a ngai khawp ang," tiin a sawi.

Chanmari West-in an match hnuhnung berah Dinthar FC 1-0 in an hneh lo a, an match hnuhnung paliah point hnih chiah an hlawh chhuak.

Table mawngphahah an awm a, team inrem dan hi an intawn tawhna aṭanga chhut a nih vang a ni a, goal difference en tur chu ni se paruknaa awm tur zawk an ni. West Warrior tan semifinal beisei chhunzawm turin Chhinga Veng lakah point hmuh a ṭul dawn a, chumi tur chuan MFA Super Cup, I Day Football leh MPL-a an intawn tawhna aia an huaisen a ṭul dawn a ni.