City an champion thei ang - Sarri

Pep Guardiola kaihhruaina hnuai­ah Manchester City an vul zel. Thawh­lehni zana 2-1 a an hneh tak Napoli manager Maurizio Sarri chuan City chu Champions League nomawi chawi thei tur khawpa ṭha an nih thu a sawi.

Etihad Stadium-ah City tan Raheem Sterling leh Gabriel Jesus ten goal an khung a, mikhual Napoli tan Dries Mertens-a penalty pet chu keeper thar Ederson-a'n dan sak mah se, penalty vawi hnihna chu Amadou Diawara chuan a chhuih lut thung. City keeper ten Champions League inelna bikah penalty an hmachhawnah hnuhnung vawi sarih zinga ṭum ruk an dang thei.

Man City manager Guardiola chuan, "Team ṭha tak lakah hnehna kan chang, player tinin ṭha takin khel lo se la chuan hnehna kan chang thei lo ang, ka naute khelh dan kha a lungawi thlak hle a ni," tiin a sawi.

Premier League hmahruaitu City hian inelna hrang hrangah a zawnin match 10 chhung hnehna an chang ta a, Spanish manager Pep-a hnuaia an khelh ṭhat tluan rei lai ber an tawng mek.

Serie A match riat an khelh aṭanga hnehna chang vek thei Napoli manager Maurizio Sarri chuan, "An che rang a, an rilru a huaisenin an thiam em em bawk. Club lian leh ṭha tam tak inelnaah hian an champion a nih pawhin a mak lo ang," tiin an hneh loh City a dah sang hle.