MFA Futsal League hmain Division One Tournament

Mizoram Football Association Futsal Committee nimina ṭhukhawm chuan, November-ah Division One (League khel ve lo tan) tournament khelh an rel a, Futsal inelna a tam thei ang buatsaih chhoh zel an tum. January 2018-ah Futsal League khelh a ni ang.

Division One

Division One-ah hian a tir aṭanga in register team pakua an awm a, tun hnaia hun hawn tharah team paruk an inziak lut leh a, hei bakah hian Futsal League khelh tuma Playoff khela vanduai ta zawngte an awm kahwm dawn a ni.

Division One tan hian tun season chhungin inelna pathum tal buatsaih an tum a, a hmasa ber chu November chawlhkar hnihnaah neih a ni ang. MFA Futsal Committee-in Division One inelna a buatsaiha an chet ṭhat dan azirin point pek a ni ang a, season thara MFA Futsal League khel thei tur zawnna a ni chho vek dawn a ni.

Season opening tournament November-a neih turah hian champion-in Rs 10,000 dawngin pahnihnain Rs 5,000, semi finalist chinin Rs 2,000 an dawng ang.

Transfer inhawng

December 1-15 chhung hian MFA Futsal chuan transfer hun a hawng. He mi chhung hian player-te an duhnaah an kal thei dawn a, chutihlaiin Futsal club nei tawhte hmun danga an insawn dawn chuan an khelhna hmasa aṭanga phalna lak hmasak a ngai ang.

Transfer hian MFA Futsal League club-te bakah Division One club-te a huam vek dawn a, player luh leh chhuah danah bithliah a awm lo ang.

Futsal Tournament

MFA Futsal Committee chuan Futsal League leh Division One club-te puala tournament hrang hrang buatsaih a phalsak. Tournament siam turte hian MFA Futsal Committee aṭangin phalna an la hmasa tur a ni a, Futsal dan leh hrai dik tak hmangin match official-ah MFA qualified referee emaw, MFA Futsal hnuaia inzir chhuakte an hmang tur a ni thung.

Futsal League

January, 2018-a Futsal League neih tur atan ruahmanna siam ṭan a ni a, hemi chungchang lo zir chiang a, a kalphung turte duang turin study group din a ni.