Golden State an chak lo nghal Cavs chakna chu James bawk
Nimin zing khan NBA regular season ṭan a ni a, champion lai Golden State Warriors chu Houston Rockets lakah 122-121 in an chak loh laiin inkhel dangah Cleveland Cavaliers erawhin LeBron James hmangin hnehna an chang thung.
Oracle Arena, Oakland-a inkhelah Golden State hian quarter hmasa pathumah hma an hruai vek a, mahse quarter hnuhnung berah Houston Rockets hi 34-24 a chungnung zawkin an lehthal.
Rockets tan hian James Harden chuan court chhungah minute 36 hun a hman chhungin point 27 a score bakah assist vawi 10 a nei bawk a, hnehna an chan theih nana player pawimawh leh ṭangkai a ni. Golden State lam tan Kevin Durant, Stephen Curry leh Klay Thompson ten khel ṭha thawhkhat viau mah se match tawp lama an inthlahdah an tuar.
Season hmasa lama Golden State champion puitu Durant chuan, "Match 82 khelh tur zinga a hmasa ber kan khel a, hah taka kan beih hnuah kan chak lo. Hun tawp dawna kan point hmuh kha pawm a ni lo, vanduai dawn ni hi chuan dan theih a ni lo," tiin a sawi. Golden State coach Steve Kerr pawhin chak lo nghal mah se an hnual loh thu leh an thawh leh nghal tur thu a sawi ve bawk.
Team ṭha pahnih inkhel dangah LeBron James chuan Cleveland Cavaliers tan point 29 score-in a club chu Boston Celtics lakah 102-99 in hnehna a chanpui. Season hmasa lama an chhandamtu James bawk khan Cavs tan thahrui pawimawh a ni chhunzawm leh nghal.
Boston hian inkhel ṭan aṭanga minute ngana lekah Gordon Hayward chu a ke rek vei lam tliak vangin an chan a, an player pawimawh pakhat awm loh hi an tuar - quarter pali an khelh zinga pakhatah chiah a chungnung zawk an ni.
Ke rek hliam dam hlim James hian hnehna an chan theih nan a thawhhlawk hle a, point a score zinga 13 te hi quarter hnuhnung bera a neih niin second 43 bak a awm tawh lo tihin Kevin Love chuan three points vawm lutin point 99 an innih rual lai chu point thumin a san pui a, basket dang a luh zui loh avangin an chak zui bawk.