FIFA U17 World Cup ; France ngamtu Spain; England an vannei
FIFA U17 World Cup khelh mekah team an inthlifim zel a, last 16 inkhel ngaihven hlawh leh hmuhnawm takah Spain chuan hneh loh nei lo chunga knockout round in petkai France chu 2-1 in an hneh.
England leh Japan inkhelah goal a lut lo a, penalty hmanga chak zawk zawn a nih hnuah England-in hnehna an chang. Iraq-in hnehna an chan zawh loh bawk si avangin Asia khawmualpui hmingchhe tur vengtu chu Iran an ni a, quarterfinal lut turin Mexico chu 2-1 in an hneh.
France chungah Spain
Team pahnih intawn hma hauhin mipui ngaihven a hlawh - France-in point kua hmu chungin a thiam 16 zingah an inpet kai a, Spain-in match thumah point ruk hmuin fiahna hautak an hmachhawn chhunah Brazil an hneh lo. Ram pahnihte chak lo turin dah an harsa ve ve a, lo theih loha duh thlan tur ni ta se, tun tournament-a an khelh dan en chuan France lama pawisa dah a ngamawm zawk.
Thawhlehni zan inkhelah pawh rinlawk ang ngeiin France lamin goal an khung hmasa zawk a, tun inelnaa goal nga khung tawh Amine Gouiri ball siamsak chu Lenny Pintor chuan goal-ah a chantirin minute 34-naah hma an hruai.
Mahse, Spain-in an tlawm chuan mualpho takin an haw dawn tih an hria a, chawlhlawk hman a nih hma lawkin Juan Miranda chuan si phurh sutna goal a khung. Team pahnihin extra time an khel mai dawn nia a lan hnuah Spain-in penalty an hlawh chhuak zui a, captain Abel Ruiz chuan boruak sang tak hnuaiah goal-ah chantirin a team hnehna a chanpui.
Iran an vul zel
Asia khawmualpui beiseina chhi nung turin Iran-in chak hmel an hmu ve zel a, match li an khelh tawha hnehna an chan vek hnuah quarterfinal an lut ve leh ta - Iran hian Thawhlehni zan khan chak hmel la hmu lo chunga last 16 lut Mexico chu 2-1 in an hneh. He inkhela goal lutte hi first half-a lut vek a ni a, goal hmahruai khung turin Iran-in an nghak rei lo.Minute sarihna lekah Mohammad Ghaderi chu penalty area-ah tih tluk a ni a, harsatna nei miah loin Mohammad Sharifi chuan goal-ah a chantir.
Goal an khung aṭanga minute thum liam hnu lawkah Iran bawkin goal an khung chhunzawm a, Mexico tlarhnung pherh zarzoin Allahyar Sayyad chuan an goal hnihna a khung. Iran hi awlsam taka chak tur angin an lang hman a, an beisei ang ngawtin thil a kal vek bik lo - Roberto de la Rosa chuan minute 37-naah Mexico tan goal a khung ve leh a, Diego Lainez leh Jairo Torres ten an hun ṭha neih an chhawr thei lo chu Iran tan vanneihna a ni - CONCACAF champion an hnawt chhuak. Iran hian quarterfinal-ah chuan Spain an hmachhawn a ṭul dawn a ni.
England tan Anderson
FIFA U17 World Cup-a player hmuhnawm ber pawl chu Borussia Dortmund winger Jadon Sancho a ni. Group Stage match thum a khelha goal thum khungtu hi a khelhna German club hian an mamawh nia inhriain World Cup aṭang hian an ko haw a, Sancho awm loh hnua England chhandamtu chu goalkeeper Curtis Anderson a ni.
England leh Japan inkhelah hun pangngaiah goal a lut lo a, extra time thlenga goal hmuh tur a awm loh avangin penalty hmanga chak zawk zawn niin England chu 5-3 in an chak. Young Lions tan Manchester City rawlthar Curtis Anderson hian penalty a pet goal bakah Japan tana Hinata Kida pet chu
ṭha zetin a dan sak a, tlarhma lama Sancho awm loh zanah tlarhnung lam aṭangin Anderson-a che chhuak ve ta thung - England hian USA chu quarterfinal-ah hian an hmachhawn dawn a, game hmuhnawm beisei ngam a ni.
Goal a sur
Mali chuan Iraq laka hnehna chang turin harsatna an tawk lo a, goal nga ngawt an khung. Mali tan match thum a khelha goal thum khungtu Lassana N’Diaye bawk chu player langsar a ni a, Mali rawlthar duhawm hian goal hnih a khung belh - top scorer ni turin a dinhmun a ṭha ta hle. Les Aiglonnets (Mali sawina) tan N'Diaye bakah hian Hadji Drame Fode Konate leh Seme Camara te chuan goal khat ṭheuh an thawh ve bawk.
Iraq tan Ali Kareem chuan hun tawp nan minute nga chiah a awm tawh tihah goal a khung ve bawk a, goal a khung lai hian 3-0 in an chak lo mek. Minute 85-a ni tawh chungin Iraq-in beiseina thar nei hman mah se goal hnih dang an chhuah chhunzawm a, last 16 luh phu zawkin hnehna an chang.