Serbia ramah Arsenal zin chhuak dawn
Zanin dar 10:30 hian Arsenal chu Europa League group match khel turin Serbian club Red Star Belgrade khelmualah an lenglut dawn. Arsene Wenger-a naute hian an match hmasa lamah Cologne leh BATE an hneh tawh avangin tun ṭumah hian an chak leh a nih chuan last 16 lut turin dinhmun duhawm takah an ding thei dawn.
Kartawp Premier League inkhelah Gunners hi Watford mualah 2-1 in an tlawm a, hun tawp dawna penalty an chawi danah Wenger lawm lo viau mah se result a thlak danglam thei tawh lo. French manager hian a thinrim hrik thlak nan chak ngei a duh dawn, a chak lo nawn a nih erawh chuan sawiselna thawm a ring leh tawh khawp ang.
Gunners ang lo takin Red Star Belgrade erawhin inrintawkna sang tak nen Europa League an khel thei dawn, kartawp an league match-ah Macva Sabac 4-0 in an sawp thei a ni. Arsenal leh Red Star Belgrade te hi kum 1978 UEFA Cup third round-ah an inhmachhawn tawh. Highbury-ah 1-1 a nih hnuah Arsenal hi khualmualah si khat faiin an tlawm a, inkhel pahnih belhkhawmah 2-1 in an chak lo - zaninah pawh Gunners hi chungnung zawk chiang sa a dah ngawt thei an ni bik lo.
Tute nge khel ang?
Arsene Wenger-a'n a vawi khat nan a naute Europa League a khelh pui a, French manager hian Premier League chu an ngaih pawimawh ber a nih zia a sawi nawn fo. Mahse, a ngaihpawimawh ang chuan league lamah an che ṭha thei lem lo. Wenger hian tunhma lama a kalpui loh dan deuhin League Cup bak chu player naupang zawk chher nan hman a tum tawh rih loh thu a sawi.
Amaherawhchu, Europa League match hnih an khelh tawhah league lama a chhawr rim loh player a luhtir tlangpui ṭhin, zaninah pawh hian a kalphung a thlak danglam vakin a rinawm chuang lo. Watford an hneh loh ṭuma inlan ve lo Alexis Sanchez leh Aaron Ramsey te chu a bul ṭantu zingah an tel beisei a ni.
Chile international Sanchez hi World Cup qualifier khelin Brazil a hmachhawn a, London lamah a kir tlai avangin kartawp khan awltir a ni. Sanchez ang bawkin Ramsey pawh ram tan a feuh chhuah vangin chawlhtir a ni bawk.
Senior player zingah Jack Wilshere, Olivier Giroud leh Theo Walcott te chu Europa League lama chhawr rim leh team innghahna an ni phak a, zaninah pawh an pawimawh leh ang. Rawlthar duhawm midfielder Ainsley Maitland-Niles leh forward Reiss Nelson te tan pawh hmun a awm theih beisei a ni.
Inkhel dang
Ronald Koeman-a kaihhruai Everton-in league match riatah point riat chiah an la hmu a, Europa League lamah pawh match hniha an khelh tawha point khat bak an la hmu lo, Group E mawngphah an ni. Zanin dar 12:35 hian Goodison Park-ah French Ligue 1 club Lyon an mikhual ang.
Dutch manager Koeman hian a chet ṭhat loh chhanah chhuanlam tur a zawng a nih chuan a player pawimawh a chhawr thei lo hnem hi a ni thei ang, tun dinhmunah Seamus Coleman, Ramiro Funes Mori and James McCarthy te chu hun rei tak chhung an chawl tawh a, anni bakah hian Aaron Lennon, Yannick Bolasie leh Ross Barkley te pawh an la khel thei dawn lo.
Nipui transfer laia an laklet Wayne Rooney-a'n Brighton lakah hun tawp dawnah goal khungin point an hlawh chhuak a, Manchester United striker hlui hi Lyon lakah pawh English club-in an hmachhuan a ni leh ang - Rooney bakah hian sum tam tak senga an lakluh midfielder Gylfi Sigurdsson-a'n a man phu tawka a khelh chhuah a pawimawh dawn a ni.
Season hmasa khan AC Milan manager Vincenzo Montella-a'n an tum ber chu European football khelh a nih thu a sawi a, an tum an tihlawhtling. Milan hian player thar lakluh nan sum an hmang hnem a, beisei ang erawh chuan an la khel chhuak lo - kartawp khan Milan derby-ah Inter chu 3-2 in an ngam lo.
Montella-a'n Milan fans rilru na tih reh nan hnehna chan a mamawh, zanin dar 12:35 hian Greek club AEK Athens an mikhual ang. Milan hi Group D-ah awmin pint ruk an hmu tawh a, zanina an mikhual tur Athens (4 points) hi an hnuai chiahah an awm - a chak zawk tan knock out round kawng a inhawng chho ang.
Europa League Group Stage
Zanin Inkhel Tur
Astana 8:30 PM Maccabi Tel Aviv
Lugano 10:30 PM Viktoria Plzen
Hapoel Be'er Sheva 10:30 PM FCSB
Ostersunds FK 10:30 PM Athletic Club
Zorya 10:30 PM Hertha BSC
BATE 10:30 PM Cologne
Crvena Zvezda 10:30 PM Arsenal
Konyaspor 10:30 PM Salzburg
Marseille 10:30 PM Vitoria Guimaraes
Nice 10:30 PM Lazio
Zulte-Waregem 10:30 PM Vitesse
Zenit 10:30 PM Rosenborg
Vardar 10:30 PM Real Sociedad
Villarreal 12:35 AM Slavia Praha
Skenderbeu Korce 12:35 AM Partizan
Dynamo Kiev 12:35 AM Young Boys
Milan 12:35 AM AEK Athens
Austria Wien 12:35 AM Rijeka
Everton 12:35 AM Olympique Lyon
Atalanta 12:35 AM Apollon
Sporting Braga 12:35 AM Ludogorets
Hoffenheim 12:35 AM Istanbul Basaksehir
Sheriff 12:35 AM Lokomotiv Moscow
Zlin 12:35 AM Copenhagen