Mizoram Fight League hun a thleng leh ta
Mizoram Fight League Season 1 (MFL) chanve zawh a ni tawh a, hmabak chanve dang a ngaihnawm chho ang. Fight week hmasa pahnih aṭangin MFL a hmuhnawm tih a hriat tawh a, zanin aṭangin R. Dengṭhuama Indoor Stadium, Mualpuiah MFL1 'fight week 3' neih a ni dawn.
Fight week 3 hi ṭum dang ang bawkin contender fight aṭangin bul ṭan a ni ang. Zanin dar 8:00-ah contender fight hi ṭan a ni ang a, en man a awm lo ang. October 20, Zirtawpni zanah mixed martial arts tuipuite en châk 'fight night' a awm dawn. Zonet Cable TV chuan MFL1 hi a pe chhuak dawn a, amaherawhchu TV aṭanga thlirten a hmuna en te boruak an hap pha lo a, MMA tuipui tan chuan R. Dengṭhuama Indoor Stadium pan mai tur a ni.
MFL hma chuan..
Mizorama MMA league hmasa ber hi Mizoram State Mixed Martial Arts Association (MISMA) hmalaknain JSJ Fight League (JSL) tiha bul ṭan a ni a. JSJ FitPro neitu, Dr. Jeremy Pautu leh Dr. Joel Pautu te hmalakna zarah JSL 1, 2 & 3 te chu hlawhtling taka neih zawh tawh a ni a, tunah Mizoram Fight League tiha chhunzawm a ni.
MFL hi MISMA leh Zonet Cable TV te ṭangkawpin an huaihawt a ni a. MFL hi Mizoram mai ni lo, India rama amateur MMA league mumal taka awm hmasa ber a ni a, All India Mixed Martial Arts Association (AIMMAA) hriatpui a ni.
Kalphung chu
Khawvel hmun danga MMA kan en ṭhin te hi chu team angin an awm ve meuh lo. Organization khat hnuaiah fighter-te’n contract ziakin, division khat hnuaia awmten champion tumin an inbei mai ṭhin. MFL-ah erawh kan la hriat lar lutuk loh team neiin kalphung a rawn danglam a - hriatthiam loh tur a awm chuang lo.
MMA League team neia kal ṭhin chu India rama kan hriat lar Super Fight League (SFL) hi a ni mai awm e. MFL-ah hian team pali (4) ah fighter-te ṭhendarh an ni a, anni hian ‘team tan’ an khel a ni ber. An chak chuan an team tan point hlawh chhuakin an chak loh erawh chuan a team te kutbengin an haw thung. Season tawpah team tiṭha ber an champion mai dawn a ni.
Awmze neiin
MFL-a hian team pali te chu Zarkawt BCA Brawlers, Mission Veng Juggernaut MMA, Promise Strivers leh DSZ Fight Club te an ni a, heng team pali a tel tur hian a duh nazawng leh a phur ve satliah a tel theih loh a, insual huai nazawng a tel ngawt theih loh bawk.
MFL main card a tel ho hi chu MMA bakah combat sports danga record ṭha tak nei an ni vek a, chumi ni lo a tel thar duh tan MISMA lamin MFL Contender a siam thung. Contender fight hi fighter tana MFL kawngka chu a ni.
MISMA hian fimkhur takin MFL hi a kalpui a, contender a tel tum leh MFL team-a fighter zawng zawng tan fitness leh skill test an nei vek bawk a ni.
MFL fight week vawi hnih neih tawh aṭanga point hmuh dan chu a hnuaia tarlan ang hi a ni.
Team Dinhmun
Team Week1 Week2 Tot
Promise Strivers 12 23 35
DSZ Fight Club 20 0 20
Mission Veng Juggernaut 13 0 13
BCA Brawlers 3 7 10