Real Madrid leh Spurs inhnehtawk

Champions League cham­pion hnem ber leh nomawi kawl lai ni bawk Real Madrid khelmualah Tottenham Hotspur an lenglut a, chak zawk awm loin 1-1 in an ṭin. Thawhlehni zan Group H inkhel dangah chak la nei lo Borussia Dort­mund chu Apoel Nicosia mualah an chak zo lo bawk.

Santiago Bernabeu-ah minute 28-naah Harry Kane vengtu Madrid defender Raphael Varane chuan Serge Au­rier-a cross chu an mahni lamah a tilut palh a, chawlhlawk hma deuhin European champion vawi 12 ni tawh Real Madrid tan Cristiano Ronaldo chuan Toni Kroos-a penalty hlawhchhuah chu an siphurh sut nan a hmang a, goal dang a lut tawh lo.

Tottenham manager Mau­ricio Pochettino chuan, "Real Madrid nena kan inkhelhtawk em em avang khan ka lawm hle. Inkhel boruak sang leh hautak takah kan chiai lo a, Hugo Lloris khan khawvela keeper ṭha berte zinga mi a nih zia a lantir bawk," tiin a sawi.

Fiahna chu

Mauricio Pochettino-a'n Premier League lamah team

ṭha an nih zia an lantir tawh a, a hmabak chu Europe-a team hlauhawm din a ni. Mipui 81,000 lenna Bernabeu-ah Spurs fans tan ṭhutna zuah hnem sak an ni lo, fans 4,000 vel chauhin Spain khawpui an pan.

Champions League match bikah chuan Bernabeu hi mikhual tan point hmuh harsatna hmun a ni. Real Madrid hian an mikhual hnuhnung team 23 zinga 21 an hneh a, vawi hnih chu an khingpui an inhnehtawk pui. Kum 2011 quarterfinal khan Spurs ngei pawh hi 4-0 in an tlawm tawh a ni.

Real Madrid tan an thiam­puipa Ronaldo-a'n goal ban tauh perin striker Karim Ben­zema chuan ho lam takin goal pawnah a pet bawk. Real hma tawng pahnih hian goal khung theihna hun ṭha nei nawn leh mah se Spurs captain leh keeper ni bawk Hugo Lloris a chesual duh lo.

Tottenham hian striker Kane hmangin hun ṭha an nei, an vawi khat khelh dun naah Fernando Llorente chuan Kane tan ball a siamsak a, England international Kane-a'n ṭha zetin Real Madrid goal-ah pet mah se keeper Keylor Navas-a'n pui zetin a dan sak. Premier League pahnihna Spurs tan Real Madrid khelmuala point khat va hlawh chhuah theih hi lawmna tur a ni.

Harh ngai Real

Zinedine Zidane-a nauten tun season La Liga bikah an khelmualah match li khel tawhin ṭum khat chiah hnehna an chang a, champion lai Real hian hmahruaitu Barcelona chu point ngaiin an phak lo.

Real Madrid manager Zidane chuan, "Tottenham hi team ṭha leh khawng tak an ni a, kan inhnehtawk hi result pangngai tak a ni. Inelna a la zo lo a, Wem­bley-ah hnehna chan tumin kan lenglut ang," tiin Spurs lakah hneh­na chan ngei a tum thu a sawi.

Spanish club Real hian point sarih hmuin Spurs nen an inzat a, knock out round lut tura ngaih niin hmahruaitu zawk nih chu a inelna tur a ni ang.

French manager Zindane-a'n team ṭha zawk an ni chunga hnehna an chang zo lo chu a ui thu a sawi a, a player duhlai Ronaldo chu a khelh ṭhat tawk loh niah pawh goal khung thei reng khawpa thiam a nih thu a sawi bawk.

Portugal international Ro­nal­do hian a zawnin Real Madrid hi Champions League nomawi a chawi pui thei a, Europe club-te inelna sang berah hian goal 110 khung tawhin amah hnaih bertu Lionel Messi aiin goal 14-in a khung tam zawk.

Chak thei lo Dortmund

Tottenham leh Real Madrid an hneh loh hnuah Borussia Dortmund tan an dinhmun siam ṭha turin chak a ngai. Bundesliga hmahruaitu hi point mamawh tak chungin Cyprus club Apoel Nicosia khelmualah an lenglut a, an mikhualna ramah 1-1 in an inhnehtawk.

Peter Bosz-a enkawlna hnuaia league khel ṭha tak Dortmund hian Champions League lamah an duh ang result an nei thei lo, minute 62-naa Mikael Pote goal khung chu Sokratis Papastathopoulos hmangin an sut hram.

Dortmund hian November thla hian Apoel leh Spurs an mikhual dawn a, group match hnuhnung ber atan December thlaah Real Madrid an lenchilh bawk ang - match thum khelh tur an la neihah chak vek pawh nise last 16 lut tur chuan midang result an ngaihchan a ngai tawh ang.