Foxes-in Shakespeare an ban
Craig Shakespeare chu Leicester City manager nghet a nih aṭanga thla li a liam hnu lekah a hna a-
ṭanga ban a ni. Foxes hian manager nghet an neih leh hma chuan season hmasa League One club Oxford United enkawltu Michael Appleton chu manager lailawk a ni ang.
Foxes hian Premier League match an khelh hnuhnung parukah chak ni hmel an hmu lo a, tunah hian table-ah a hniam ber pathumnaah an awm mek. Thawhṭanni zan khan an mikhual West Brom chu 1-1 in an inhnehtawk pui hram a, hmasawn loa an hnung tawlh zel avangin Shakespeare hian hna a chan phah.
Kum 2015-16 season khan Claudio Ranieri chuan Foxes hi Premier League nomawi chawi puiin khawvel a barakhaih a, Italian manager hi a season lehpekah a chet ṭhat tawk loh avangin a hna a chan zui ta tho. English manger Shakespeare-a'n Ranieri hmunruak luahin kum thum daih contract ziak mah se thla li bak hun a hmang ta chuang lo.
Leicester City chuan thuchhuah siamin, "Craig hi assistant manager a nih lai aṭang tawha club tana mi pawimawh leh ṭangkai a ni a, club tana a hnatawhte hi kan hre reng ang. Tun hnaiah result ṭha kan neih theih loh avangin thil tih danglam ngai a awm a, hmasawn zawnga kawng dik kan zawh theih ngei kan beisei," tiin an sawi.
Foxes hian tun season inelna hrang hrangah match 10 khelin vawi thum hnehna an chang a, ṭum li chak loin an khingpuite nen vawi thum dang chu an inhnehtawk. League bikah August 19 khan kaithar Brighton 2-0 in an hneh a, hemi hnuah chak ni hmel an la hmu leh lo - an hneh loh hi - Arsenal, Manchester United, Chelsea leh Liverpool te an ni.