Mizoramin National Games-ah medal pali an la

Mizoram tan Malsawmtluanga leh Lallawmawma ten National Games 2022 boxing-ah medal pahnih an la. Anni hma hian weightlifting-ah Ainawn veng tlangval Zakhuma chuan bronze medal a chawi chhuak a, Judo-ah Zemabawk North nula Lalhumhimi chuan gold medal a la tawh bawk.

Mizoram hian medal pali - gold medal leh silver medal pakhat ve ve bakah bronze medal pahnih an hlawh chhuak. Tun ṭum inelnaah hian Mizoram Olympic Association (MOA) secretary general V. Lalzawmliana chu Mizoram Contingent Chef de Mission a ni a, Lalduhkima Sailo chu Dy Chef de Mission a ni.

Chef de Mission Mazawma chuan, "Mizoram thlen chin hi a lawmawmin a hlawhtling thawkhat viau chuan ka hria, chutihrualin hmasawnna tur tam tak kan la nei. Inelna ṭhenkhatah khan medal kan la teuh thei hle a, state dang kan phak lohna kha a tam bik lo.

"Nakkum hian Goa-ah National Games a awm leh nghal dawn, chumi tur atan chuan theihtawpin inbuatsaihna kan nei leh nghal ang. Theihtawp kan chhuah a nih chuan state dang pawh kan el ve phak zel ang," tiin Vanglaini a hrilh.

National Games 2015-ah khan Mizoramin medal paruk (G-1, S-2, B-3) an hawn a, tun ṭumah Kerala-a gold medal hlawh chhuaktu football mipa team chu an tel pha lo. Kum 2015 khan Mizoramin Taekwondo-ah silver pakhat leh bronze medal pathum an la a, tun ṭumah hian Taekwondo-ah Mizoram an tel lo.

Kerala-ah khan Khawzawl nula Lalchhanhimi chuan weightlifting-ah silver medal a la a, tun ṭumah erawh Chhani telna weight category hi telh a ni tawh lo thung.

Nimin tlai khan National Games 2022 hi a hmawr an bawk. Gold medal 56 latu Services chu an chungnung ber a, anni hian silver medal 34 leh bronze medal 31, a vaiin medal 121 zet an la.