Real-in Shakhtar inhnehtawkpui hram

Shakhtar Donetsk lakah Real Madrid an hnufual reng a, mahse, hun pek belh minute nganaah Antonio Rudiger chuan Real tan huaisen takin a tauh lut a, 1-1 in an inhnehtawk.

Group F inkhelah Shakhtar Donetsk-in rin loh takin goal an khung hmasa a, Oleksandr Zubkov chuan mualneitu team tan minute 46-naah goal hmahruai a khung.

Real-in vawi 17 zet shot nei mah se an vanneih zan a ni lo a, goal khung turin hun pek belh an nghah thlen a ngai - Toni Kroos-a ball cross chu Rüdiger chuan a lo tauh a, a goal.

Mahse, German defender hi ball a tauhna lamah Shakhtar goalkeeper Anatoliy Trubin nen an intauh fuh a, thisen chhuak chungin khelmual a chhuahsan a ṭul.

Real boss Carlo Ancelotti chuan, "A chal a kak a, a dam leh vat ang. Goal pawimawh a khung avangin amah phei chu a hlim em em a ni," a ti a, a defender a ngaihtuahawm loh thu a sawi - Real hian Pathianni zanah Barcelona nen league match an khel dawn.

Group F inkhel dangah RB Leipzig chuan Timo Werner leh Emil Forsberg goal hmangin Celtic chu 2-0 in an hneh a, match hnih khelh tur la awm awm mah se Celtic chunga awm Leipzig leh Shakhtar an la inhmachhawn dawn avangin Scottish club tan beisei tur a awm tawh lo.