Lungawi lo Mbappe-a'n goal a khung
Kylian Mbappe a lungawi lo, a khelh mekna Paris St-Germain chu a rang thei ang bera chhuahsan a duh, tih thu kan hre zo chiah a, chanchin thar dang lang zui nghal zat chu, 'Goal a khung' tih a ni.
Thawhlehni zan Champions League group match inkhelah Mbappe-a penalty chu PSG chak nan a tawk zo lo, mikhual Benfica lamin Joao Mario-a penalty hmang vekin an chang let a, team pahnih 1-1 in an inhnehtawk.
Group H inkhel dangah Juventus chu Maccabi Haifa lakah 2-0 in an mualpho. Old Lady hian match li aṭangin point thum chauh an nei, an chunga awm Benfica leh PSG ten point riat an nei tawh, chhiarkawp danin la tling thei mah se kawng a zim ta hle.
Messi tel lohna
Paris khawpuia inkhel hi Lionel Messi chuan mipui zing aṭangin a lo en. Argentina captain hi a chawn a hliam a, an match hnuhnung pahnihah a inlan thei ta lo. Heng inkhel pahnihah hian PSG an chak zo lo ve ve.
Messi awm lo mah se Mbappe leh Neymar an awm a, anmahni khelmual a nih bawk avangin PSG hi rinkai an ni. Mahse, penalty bak an khung thei lo, hun tawp dawn Mbappe-a volley luh chu offside vanga hnawlsak a ni.
Chak zo ta chiah lo mah se PSG hian hma an hruai tho a, harsa lutuk loin last 16 an luh theih a rinawm. Portuguese club pawhin Paris club laka point an hmuh theih miau avangin group stage paltlang turin an dinhmun a ṭha ta hle.
PSG coach Christophe Galtier chuan, "Kan intawn hmasak kha chuan goalkeeper an rim dun hle, tunah chuan defender-ten striker an dang ṭha viau. Portuguese club khan an khel ṭha angreng, chu tih rualin a pumpui thlir chuan chak phu zawk kan ni," a ti.
Juve an tlawm
Chak mamawh, point mamawh ngawih ngawih an nih lai pawhin Juventus an chak thei lo. Italian club lian tan Maccabi Haifa 2-0 a hneh loh hi zahna tham a ni a, manager Massimiliano Allegri hma hun pawh a ti nghing ngei ang.
Tlang tur chuan Juve hian Benfica an luhchhuah a ngai dawn a, hei bakah hian Allianz Stadium-ah Paris St-Germain an hneh a ngai dawn. An khingpui tur tan hian point khat lek hmuh belh pawh a tawk avangin Allegri naute tan kawng a harsa dawn hle.
Juve manager Allegri chuan thiamthu sawi tur an neih loh thu a sawi a, an tan ngawih hun a ni a ti bawk. Club president Andrea Agnelli chuan, "Hriatthiam a har, a zahthlak bawk. Mahse, hei hi football ken tel a ni," a ti.
Inrinni zanah Torino nen Turin derby an khel zui dawn, an chesual leh a nih chuan beiseina sang tak nena an lakluh manager Allegri hi an ban a nih pawhin a mak lo ang, hun rei lote chhunga insiamṭhat an mamawh.
Chhuah duh Mbappe?
French football expert Julien Laurens sawi dan chuan, hmanni lawka contract ziak thar Kylian Mbappe chuan Paris St-Germain chu nakkum January thlaah chhuahsan leh nghal mai a duh.
France forward hian May thla khan kum thum daih contract a ziak, mahse Paris club nena inremna an nei chhunzawm chu a tihsual a niah a ngai, a duh leh beisei ang an tihsak loh avanga chhuak duh niin an sawi.
Laurens chuan, "Contract an ziah laia thu an tiam ang khan thil a thleng ta si lo a, hei vang hian club lakah a lungawi lo hle. Thu an tiam dan chuan striker thar an lei ang a, chuan Mbappe hi a duhna takah a khel thung ang.
"Neymar chu hralh chhuah tur a ni ang a, heng bakah hian defender thar an lei bawk ang. Mahse, hengte hi a takin a thleng lo. Chuvangin thutlukna a siam sual niah a inngai. Thlasik bazar inhawn hunah amah hi chhuah mai a duh," tiin a sawi.
Hetih lai hian PSG sporting advisor Luis Campos chuan, "Ni tin Kylian Mbappe te nen hun kan hmang ziah, January thlaa chhuah a duh thu a sawi ka hre lo. Mbappe hian kei leh president Nasser Al-Khelaifi hnenah chhuah a duh thu a sawi lo.
"Thuthang vel hi player aṭanga chhuak a ni lo, media lam aṭanga rawn ri chhuak a ni. Hetiang thil tih darh hi chu kan ngai thutak khawp mai," tiin an player chu a chhuah a rin loh thu a sawi ve thung a, manager Christophe Galtier pawhin a pawmpui.