San Siro ngawihtirtu Potter-a Chelsea
Club lian enkawl ngai lo Graham Potter-a'n amah ringhleltute chu thiltih hmangin a chhanglet zel a, Potter-a chunga beiseina nei ngam lote pawhin ngawih an chuh ṭan ta.
Thawhlehni zan khan Chelsea chuan Champions League group stage match pawimawhah AC Milan chu 2-0 in an hneh a, Jorginho (penalty) leh Pierre-Emerick Aubameyang ten goal khat ve ve an khung.
Blues chakna kawngkhar hawng turin Chelsea defender hlui Fikayo Tomori chuan minute 18-na lekah red card a hmu a, penalty a chawi tel bawk - chak tur a chiang hma hle.
Group E inkhel dangah Dinamo Zagreb leh RB Salzburg te 1-1 in an inhnehtawk a, group match hmasa pahniha hnehna chang zo lo Chelsea chu group hmahruaitu an ni ta daih - last 16 an hnaih zel e.
Kawngkhar hawngtu
Chelsea-in Stamford Bridge-ah AC Milan lo hneh tawh mah se San Siro-ah meuh chuan chak tura rin ngam an harsa a, an thawnthu hlui keu let pawhin, Italy leilunga an chak hnuhnung ber chu November 2003-a 4-0 a Lazio an hneh kha a ni daih tawh - khatihlaia an coach chu Claudio Ranieri a ni.
Mahse, minute 18-na lekah Fikayo Tomori a chesual a, Chelsea defender hlui hian Mason Mount chu a darah a kuai a, English midfielder a tlu - Milan player-ten referee Daniel Siebert pan nghal mah se inthlahrung loin lehkha sen a phawrh a, penalty spot a kawk bawk.
Chelsea tan penalty pet thiam bik Jorginho a lo pen chhuak a, Napoli midfielder hlui hian zam hmel pu hauh loin goal-ah a chantir - Chelsea-in goal an khung hi minute 21-na chiah a ni a, goal khung bawk, player tam zawk bawk, an ni a, chak tur a chiang deuh der!
Tomori-a'n a club hlui goal a 'khilai' a, Pierre-Emerick Aubameyang erawhin a club hlui lamah goal a khung thung - AC Milan striker hlui hian minute 34-naah Chelsea tana a goal thumna a khung a, Gabonese striker-in goal khung a la thiam reng e.
Potter-a Chelsea
Chelsea-in 2-0 ni chungin chawlhlawk an hmang a, second half-ah erawh goal dang an khung tawh lo - mahse, mualneitu Milan-in goal an khung ve miau loh avangin Chelsea hi awlsam takin an chak a, lungdam takin London panin an haw.
Brighton & Hove Albion a enkawl lai pawha team siksawi nuam ti tak Potter-a'n an match hnuhnung bera Wolverhampton Wanderers hmachhawn aṭangin player pali chiah bul a ṭan nawntir a, a khelh dan tur rin lawk a harsa ṭhin hle!
Potter-a hnuaiah Chelsea hian match nga chiah an la khel a, heng match zawng zawnga bul ṭan vek chu player pahnih chiah an awm - goalkeeper Kepa Arrizabalaga leh Mount an ni.
Spanish keeper Kepa-a'n Thomas Tuchel hnuaiah hmun chang lo mah se Potter-a lung erawh a dum a, English coach hnuaia match nga an khelhah an la tlawm loh miau avangin Potter-a system duh lo tan pawh sawiselna remchang a la awm lo - hetihlai hian right back Reece James a inhliam a, he thu buatsaih a nih lai hian a dinhmun chiang taka sawi theih a ni lo.
Milan an lawm lo
Chelsea lakah a zawnin an tlawm a, Blues an hmachhawn hmaa group hmahruaitu Italian club hi table-ah pathumna an ni zui - pahnihna RB Salzburg nen point li ve ve an nei a, a mawngphah luahtu Dinamo aiin point khat chauhin an sang.
Milan boss Stefano Pioli-a'n an dinhmun a derthawng tih a hai lo a, chak loh chhanah referee Daniel Siebert a mawhpuh. Pioli chuan, "Referee khan a hun ṭha ber chu a hmang lo chiang a ni. Penalty leh red card khan engkim a thlak danglam a, Chelsea kha a tam zawka an khelh ṭulna a awm lo.
"Kha thil thleng kha en let pawh a ṭul lo a, a chiang vek a ni. Engmah sawi ka tum lo - referee erawh ka ngaihdan ka hrilh a, sap ṭawng hi ka thiam lutuk lo a, mahse, a hrethiam chuan ka hria, " a ti!
Chelsea boss Graham Potter chuan, "Penalty leh red card kha thil thlak danglamtu pakhat a ni a, chutihrual chuan chhawr thiam kha a ngai ve tho a ni. Player 10-in khel mah se San Siro a nih miau avangin a awlsam lo - fan-ten an pui ṭha a, tihsual hleka goal chhuah thei reng kan ni.
11 vs 11 ni ta se, kan ti ṭha tho ang, tih ka ring a, mahse, referee-in thutlukna a siam tawh avangin kaltlangpui a ngai a ni, " a ti a, player kim ngeia Milan hneh a châk.