Mizo lansarh zanah Odisha comeback a ropui

Indian Super League a hmuhnawm zel a, Thawhlehni zan khan Odisha FC chuan Jamshedpur FC lakah comeback ropui an lantir - Odisha hi minute 80 hnu thlengin 2-1 in an hnufual a, mahse, hun a tawp meuh chuan 3-2 in an chak daih!

Odisha tana danglamna thlentu chu Mizo pahnih Isaac Vanmalsawma leh Isak Vanlalruatfela te an ni a, bench aṭanga an luh hnuin thawnthu an thlak danglam.

Hnahthial tlangval Isaac hian minute 88-naah mawi zetin si phurh a sut a, Isak-a siamsak a ni. Thingsulthliah tlangval Isak-a hian hun pek belhah Diego Mauricio goal khung tur a siamsak zui a, an match hmasa berah an chak.

Sorry Ricky!
JRD Tata Sports Complex, Jamshedpur-ah ruah sur vangin inkhel ṭan lawk theih a ni lo a, inkhel ṭan a nih hnuah Ricky Lallawmawma chu player langsar hmasa a ni - minute thumna lekah Ricky hian hlauhawm takin cross a nei a, hei hi Thoiba Singh chuan lo dang mah se a per lehlam chu JFC tan Daniel Chukwu chuan goal-ah a chantir.

Minute sarih a liam awrh a, Ricky bawk kan hmu - Durtlang tlangval hian Boris Singh tan awlsam taka khung turin a siamsak a, 2-0 a ni. Mahse, minute 17-naah Mauricio chuan si phurh a rawn sut ṭhen a, Odisha-in beiseina an nei.

Hun tawp nan minute hnih chiah a awm tawh - Isak leh Isaac ten ball an inpek kual hnuah Isaac-a'n a ke vei lamin a chhuih goal a, 2-2 a ni. Isak-a a chawl lo, mawi zeta ball a lakluh hnuin Mauricio tana duhthusama ṭhain a siamsak a, Brazilian forward hian chakna goal khung nan a hmang.

Mizo lawmna
Isaac-a'n tun season ISL-a a match hmasa berah goal a khung nghal a, a hlim hle. Shillong Lajong captain hlui chuan, "Goal khung ka inring lo. Ka ke vei lam kherin ka pet goal bawk si a, Pathian vang a ni, " tiin Vanglaini a hrilh a, theihtawp chhuah chhunzawm a tum thu a sawi bawk.

Minute 81-naah Isak-a luhtir a ni a, hun tlemtê chhungin danglamna a thlen. Aizawl FC forward hlui chuan, "Hun a tlem tawh ngaihtuah kha chuan warm up pawh khan ka mawng hi a za zek zek tawh a ,chak loh ka hlau a ni ber mai, goal hnih ka thawk chhuakah ka inngai hran lo a, kan vai thawhrah a ni," tiin Vanglaini a hrilh.

Odisha-ah Mizo player pariat an awm a, Isaac leh Isak-a te bench aṭanga an luh bakah, Jerry Mawihmingthanga chuan inkhel bul a ṭan bawk - JFC tan Ricky bakah Laldinliana Renthlei chuan bul a ṭan.

October 12, Nilaini Zan
Jamshedpur FC 2 - 3 Odisha FC
JAM: Daniel Chukwu 3'; Boris Singh 10'
ODI: Diego Mauricio 17', 90+1'; Isaac Vanmalsawma 88'
Zanin Inkhel Tur
NorthEast United 7:30 PM Hyderabad FC