Australian Open an inhawng zau

Tennis season kal lai a zo hnai a, season thar kalphung tur an sawi leh ṭan ta. Grand Slam pali zinga hmasa ber Australian Open chuan Russian leh Belarusian player-ten Malboure Park-ah inelna an hmachhawn theih tur thu an sawi.

Tournament director Craig Tiley chuan Novak Djokovic pawh a inkhel thei a nih chuan an lawm tur thu a sawi a, chu tih rualin hripui leng vanga sorkar thuneitu lamin dan leh hrai zawm tur an siam chu ti danglam theitu an nih loh thu a sawi bawk.

Tiley chuan, "Tuna kan ngaihdan chuan Russian leh Belarusian player-te thliar hranna a awm lo ang. Ram aiawh erawh an ni lo thung ang," tiin a sawi. Indo buaina vangin Russia leh Belarus ram hi infiamna peng hrang hranga hrek mek an ni.

An ram hmingin inlan thei lo mah se, neutral athlete ni chungin an khel thei dawn tihna a ni. Season hmasa khan ram pahnih player-te hi Wimbledon an khelh phal a ni lo, major tournament dang erawh chu an khel vek.

Djokovic chungchang sawiin Tiley chuan, "Dan leh hrai chu keini siam danglam theih a ni lo. Hei chu Novak leh sorkar thuneitu lam inkar a ni. Tournament buatsaihtu lam chuan rawn tel thei ngei se tih hi kan duhthusam a ni," a ti.

Australia ramah hian Covid-19 laka invenna vaccine la lo tan zin luh theih a ni lo. Djokovic hi vaccine la duh lo zinga mi a ni a, tuna an kalphung ang chuan a zin thei dawn lo. Inelna neih hmain thla thum vel a la awm a, an kalphung erawh an la ti danglam thei bawk.