Arsenal tan chak a pawimawh

Premier League hmahruaitu Arsenal chuan zanin dar 10:15 hian Europa League khel turin Bodo/Glimt an tlawh dawn. Mikel Arteta naute hian group match hnuhnung lama hahdam an duh a nih chuan Norwegian club hneh hi a pawimawh.

Zanlai dar 12:30-ah Manchester United chuan Omonia an mikhual ve bawk ang. Cyprus mualah Man United hian goal hnih an chhuah a, zaninah Erik ten Hag-a naute tan fimkhur a ṭul ang. Old Trafford a nih dawn avangin a boruak erawh a danglam ang.

Chak a ngai
Arsenal hian match hnih aṭangin point ruk an hmu tawh a, group A hmahruaitu an ni. Gunners match khelh tur pakhat a hun sawn a ni a, an elpui dang pahnih aiin PSV Eindhoven nen match khatin an khel tlem.

Group hmahruaitu hian last 16 an lut tlang nghal dawn, pahnihna tan last 32 (playoff) khelh a ngai dawn. Hei vang hian group match tawp lam bakah, kum thara match hnih dang khelh hah a ngaih loh nan hmahruaitu nih a pawimawh hle.

An group match hmasa lamah Arteta-a'n league khel tura a la rin loh te a khelh tir ṭhin, zaninah pawh Liverpool laka match hautak khelte kha chu an inlan tam a rinawm lo, kar tawpa Leeds United nen an inkhelh tur a ngaihtuah tel a ngai ang.

Gabriel Jesus aiawh turin Eddie Nketiah a awm a, midfielder Granit Xhaka aiah Fabio Vieira a awm thei ang. Reds laka rin hlawh lo Kieran Tierney tan a theihna lantir theihna remchang a ni dawn, tlarhnung laiah Rob Holding a ding bawkin a rinawm.

Ronaldo?
Everton lakah Cristiano Ronaldo-a'n Manchester United a chakpui a, khelmual a luh chhan hi Anthony Martial inhliam vang a ni. Zaninah Ronaldo hi a inkhel zui leh nghal ang em tih chu sawi lawk harsa tak a ni.

Martial a awm loh chuan Man United hian Ronaldo an mamawh, kar tawpah Newcastle Unted nen an inkhelh hun atan a tha khek a pawimawhin a rinawm. Kum 37 mi forward hi ni hnih kar dan leka match khel tur chuan a thain a tlin tawh bik lo.

Man United hian an group match hmasa lamah Real Socieded an hneh lo tawh, hei vang hian group-ah pahnihna an ni mek. Last 16 lut tlang nghal tur chuan an chetsual a thiang tawh lo a, chak ngei tura player rem chu a ngai thung si a ni.

Queen Elizabeth thihna vangin an league match khelh tur sawn a ni tawh bawk a, an elpui ṭhenkhatte aia league match khelh hmabak an ngah bawk avangin match a inhnaihchilh chho dawn, manager tan thiam taka player siksawi reng a ṭul ang.