Zambia-in an fapa rangkachak Mwepu an ui

Brighton & Hove Albion midfidler Enock Mwepu-a'n inkhelh a chawlhsan thu a puan hnuah uitu leh khawngaihtu a ngah a, a bik takin a ram Zambia aṭangin uitu an ṭhahnem hle.

Kum 24 mi Mwepu hian a lung lam harsatna avangin Thawhṭanni khan inkhelh a chawlhsan thu a puang a, Brighton chuan an player hian a khel lui zel a nih chuan a lung lam ṭha lo avanga buaina a tawh mai a hlauhthawnawm thu an sawi a ni.

Zambia international Enock Mwepu hi international break-ah khan ram tan a feh chhuak a, mahse, Mali an zinnaa a damlo a, ni li zet damdawi ina a awm hnuah England-ah an thawn kir.

England-ah hian a dinhmun en dik zui a ni a, a lung lam fel lo hi hmuhchhuah niin, Brighton chuan chawlh mai loh chu duhthlan tur dang a neih loh thu an sawi a ni.

Football Association of Zambia (FAZ) chuan Mwepu chanchin chuan a ṭhawn thu leh hrehawm an tih thu an sawi a, FAZ president Andrew Kamanga chuan, "Damlohna thil a nih miau avangin kan tan sawi tur a vang a, mahse, kan captain hi kan duhsakna sang ber kan hlan a ni," a ti.

Zambia legend leh African footballer of the year pawh lo ni tawh Kalusha Bwalya chuan, "A hun rei lotê chhungin Zambia tan a ti hnem em em a, a lakah hian bat kan ngah hle a ni," tiin an ram captain chu a thlah ve bawk.

Brighton boss Roberto de Zerbi chuan, "Puih a ngaihna apiangah kan pui ang," a ti a, Chelsea boss Graham Potter chuan, "Mi ropui tak a ni a, eng pawh ti se a hlawhtling ang - mahse, khelmuala kan hmu tawh lo tur hi a pawi ka ti," tiin a thlah.

Mwepu hian Austrian club Red Bull Salzburg aṭangin a hming a chher ṭan a, kum 2021 khan Brighton & Hove Albion zawmin, season hnih chhunga match 27 khelin goal thum a khung.

Zambia tan vawi 23 inlana goal ruk khungtu Mwepu hian kum 2017 khan an ram hi African Under-20 title a lakpui a, Red Bull Salzburg tan league nomawi vawi li zet a chawi bawk.