India-in South Africa an hneh

India chuan ODI match thumnaah South Africa chu wicket sarihin an hneh a, 2-1 in series an la. Arun Jaitley, New Delhi-ah India bowler-te an che ṭha a, over 27.1-ah an khingpuite an vawm hlum vek a, Proteas hian 99 runs chauh an siam avangin Men in Blue batter tan hna a harsa tawh lo. Over 19.1 lekah India hian 105/3 runs siamin hnehna an chang.

India captain Shikhar Dhawan-a'n vawm hmasak a thlang a, Proteas batter-ten Kuldeep Yadav (18/4), Washington Sundar (15/2), Mohammed Siraj (17/2) leh Shahbaz Ahmed (32/2) te an ngam lo. Mikhual team aṭanga run siam tam ber Aiden Markram-a'n 34 runs chauh a siam a, 10 runs siam tling lo player pariat zet an awm.

India bat hun a thleng a, captain Dhawan-a'n run riat chauh siam mah se Shubman Gill-a'n 49 runs a siam a, an target a san loh bawk avangin hnehna chang turin harsatna an tawk lo. Men in Blue hian South Africa hi T20 leh ODI-ah an hneh ve ve a, tunah chuan T20 World Cup atan an insawrbing thei tawh ang.