Premier League khel turin inlungrual a ngai - LMA

League Managers Association chief executive Richard Bevan chuan Premier League club-te chuan 'neutral venue' a inkhelh an remtih loh chuan English top flight league chu khelh chhunzawm theih loh mai a hlauhthawnawm thu a sawi. 

Premier League hi coronavirus hri leng vangin June 12 aṭang khan chawlh lailawk a ni a, a kar lakah thuneitute inhmukhawm ṭhin mah se an beisei angin thutlukna an siam hleithei ṭhin lo. 

English top flight club 20-te hian league khelh zawh an duh vek a, mahse an beisei anga khel zo tur erawh chuan league kalphung pangngai anga home & away-a khelh theih a nih a rinawm loh. 

Tuna rawtna awmah chuan league hi khelmual pakhatah, mualneitu bik awm lohna muala khelh zawh mai rawtna a awm - hei hi club ṭhenkhat chuan an duh lo a, Aston Villa leh Brighton & Hove Albion chuan neutral venue-a season hman zawh an duh loh thu hi ualau takin an sawi tawh. 

Premier League club-te hian Thawhṭanniah neutral venue-a league khelh zawh chungchangah vote an thlak dawn a, LMA lam duh dan anga neutral venue-a league khel zo tur chuan club 20 zinga 14-in a duh lamah vote an thlak a ngai dawn a ni. 

Bevan chuan, "Neutral venue-a khelh zawh hi kan duh tlang a nih loh chuan league khelh zawh theih a nih ka ring lo a, sorkar ngei pawh hian rem a ti kherin ka ring lo," a ti. 

Premier League club-te hian league khelh zawh ngei an duh avangin 'Project Restart' tih chu an lo kalpui tawh a, he ruahmanna ang chuan June-a league khelh ṭan leh a, July-a khelh zawh mai a awm. 

June-a league khel ṭan tur erawh chuan May 18-ah full training neih a ngai leh tawh dawn - Premier League-in July-ah tal league khelh zawh an duh chhan hi UEFA hnuaia inelnaa buaina an tawh loh nana tih a ni pakhat. 

Premier League club-te hi Zirtawpni khan video conference hmangin an indawr a, "Kan him tlan vek theih hunah khelh chhunzawm ni se," tih bakin thu dah an nei lo - league hi khelh chhunzawm a nih dawn chuan player leh staff-ten test an neih vek phawt a ngaih dawn avangin 40,000 vel test neih a ngai ang. 

Premier League club-ten doctor leh physio engemaw zat an nei a, heng ho inzawmkhawm pawl Football Medicine and Performance Association (FMPA) chuan an dinhmun chu hlauhthawnawma a din thu an sawi. 

English top flight football club 20-a doctor-te chu 'Project Restart' chungchangah hian an inhmukhawm ve a, player zingah Covid-19 kai lo awm ta se doctor-te sa himna, mawhphurhna leh insurance thlenga an ngaih pawimawh thu an sawi a, mawhphurtu bikah puh thluk an ni ang tih an hlau a ni ber. 

LMA hotupa Bevan chuan, "Eng thutlukna pawh siam dawn ila hriselna hi kan dah pawimawh hmasak ber tur a ni a, him taka inelna chhunzawm leh theih hi kan beisei chu a ni," a ti. 

Manchester City striker Sergio Aguero chuan coronavirus hri leng kara training tura kir leh chu player-ten an hlauh thu a lo sawi tawh a, "Nupui fanau nei kan nih avangin player tam zawk chu an hlauthawng a ni," a ti.

Player rualin training neih an hlau hi a awm lo hran lo - mahse, English top flight football thuneitute chuan a him thei ang bera engkim kalpui turin ruahmanna an siam. Ruahman dan chuan player-te hi kar khatah vawi hnih chu Covid-19 an kai leh kai loh enfiah a ni dawn a, nitin an hriselna dinhmun en ṭhin a ni bawk ang. 

Hetihlai hian UK prime minister Boris Johnson chu Pathianni khian lockdown kalpui zel dan tur puang tura beisei a ni a, lockdown hi thlahdul ngei a nih a rinawm - Prime Minister thusawi tur hian Thawhṭannia Premier League-in vote an lak turah pawh nghawng thui tak a neih theih rin a ni.