Mizoram Fight League Zanin a hmuhnawm dawn
Mizoram Fight League Season 1-ah fight night ṭum hnih neih a ni tawh a, zanin hi a ṭum thumna tur a ni. MFL en tawh chuan inngaihtuah buai loin zanin hian R. Dengṭhuama Hall, Mualpui an pan mai a rinawm a, la en lo chuan 'fight night 3' hi en ve ngei chi a ni.
Main Event
Middleweight bout-ah Lalṭhasanga leh Imanuel Lalthianghlima te an inhmachhawn dawn. BCA Brawlers fighter Lalṭhasanga chuan Jack Lalsangliana hneh lo mah se Juggernaut fighter Immanuel Lalthianghlima hneh ngei a tum dawn, he fight hi main event a ni ang.
Middleweight fight dangah fight night 1-a Ngurlianzuala hnehtu DSZ Fighter C. Lalfamkima a inlan leh dawn, Lallawmawma nen an inhmachhawn dawn.
Fight dang
Tualchhung boxing aṭanga hriat hlawh Lalrinawma (Ago-a) chuan MMA a luhchilh a, BCA fighter Ago-a hian featherweight-ah DSZ fighter Lalchhuanmawia a hmachhawn dawn, he fight hi main event ni lo mah se mite hmuh châk a tling phak.
Lalchhuanmawia hi MMA fighter niin ground-ah a ṭha hle tura ngaih a ni, hetih lai hian Ago-a hnek fuh palh erawh a hlauhawm khawp ang, khelh dan hmang inang lo tak an inhmachhawn dawn niin a lang a, tu nge ding chang zawk dawn tih chu hunin a hril ang.
Cage chhungah incho leh incho an inhmachhawn a, rilru thianghlim tak pu chungin na taka inkhawih an tum dawn. Mixed Martial Arts-ah Mizote an duai lo a, hmuhnawm takin an khel thei a, mipui pawhin an hlut chho zel. Zanin hian bout 9 a awm dawn a, inpuahchahna an neih ṭhat avangin a hmuhnawm hlawm khawp ang.
Fight night enna ticket hi Rs 100 leh Rs 500 mana siam a ni a, NetSurf Office (Chanmari, Bawngkawn, Mission Veng), BHHO Gym Chanmari, Bajaj World Vaivakawn leh RK Digitals Dawrpui Vengtharah te lei lawk theih a ni a, ticket hi a hmunah lei tur a awm bawk.
Point hmuh dan
MFL-ah hian team pali Promise Strivers, DSZ Fight Club, Mission Veng Juggernaut leh BCA Brawlers te an awm a, heng team te hian anmahni pualin fighter an nei vek. Fighter te point hlawhchhuah hi team point-ah a kal a, tun dinhmunah Promise Strivers-in point 35 hmuin hmahruaitu an ni.
Point hmuh theih sang ber chu 10 pts a ni a; Knock out (KO), Technical Knock out (TKO) leh Submission (SUB) hmanga chak a ngai. Fighter a inlan thei lo a nih chuan a khingpuiin point nga a hlawh ang a, disqualify leh inhliam vanga chak tan point nga tho a ni bawk. Unanimous decision hmanga chak tan point thum a ni a, split decision hmanga chak tan point hnih a ni thung. Chak lo tan point a awm ve lo.
MFL 3 FIGHT CARD
Flyweight Bout (Female)
Lalrinpuii (P) Vs Lalvenhimi (J)
Flyweight Bout
Lalrosanga (P) Vs Lalbiaksanga (B)
Lalrotlinga (P) Vs Lalruatkima (D)
Lalnunsiama (P) Vs Ngursaimawia (B)
Bantamweight Bout
PC Lalhminghluna (J) Vs David Zairemthanga (B)
Featherweight Bout
Lalchhuanmawia (D) Vs Lalrinawma (B)
Lalruatdika (D) Vs Israel Lalfela (J)
Middleweight Bout
Lalṭhasanga (B) Vs Imanuel Lalthianghlima (J)
Lalfamkima (D) Vs Lallawmawma (J)
Note : P - Promise Strivers; J - Mission Veng Juggernaut;
D - DSZ Fight Club; B - BCA Brawlers
Team Dinhmun
Team Night1 Night2 Pts
Promise Strivers 12 23 35
DSZ Fight Club 20 0 20
Mission Veng Juggernaut 13 0 13
BCA Brawlers 3 7 10