Zanin Lammual pan zan ; BVT khingpui tur an coach hlui BS-a leh Police
Mizoram Police-in coach Lalbiaksanga Colney hnuaiah harhtharna an chang a, match thum an khelh aṭanga point sarih hlawh chhuakin semifinal thlen phak an tum ruh hle. Police hian zanin dar 7:30 hian Bethlehem Vengthlang an hmachhawn dawn a, BS-a hian MPL5 khan BVT hi final a hruai thleng a ni.
Club hlui
Police coach BS-a chuan, "Mahni club hlui hmachhawn chu a dang dawn khawp mai. Coach tam takin an club hlui tum hi an châk kher lo ang, chutiang zinga mi chu ka ni. Nikum khan BVT mipui nen kan inkar a ṭha a, kan inngaina a, kan inhmachhawn tur hi nuam ka ti lo. Amaherawhchu coach ka ni a, tuna ka enkawl Police chak theih nan theihtawp ka chhuah ang," tiin Vanglaini a hrilh.
Bethlehem Vengthlang pawhin an coach hlui BS-a hi an dah sang a, club secretary Lalruatfela Hmar chuan, "BS-a hi team tana a theihna zawng zawng hlan
ṭhin a ni a, ka chhuang khawp mai. A player neih ang ang a hmang thiam a, kan inhmachhawn tur hi team pahnih tan chona lian tak a ni. Team tinte kan point hmuh a inthlauh loh avangin he match hi kan hmalam hun hriltu pawh a nih tel ka ring," tiin an coach hlui a fak.
BVT thar
Police hi BS-a hnuaiah an intuai thar a, BVT pawh an inla ṭha. Coach Chawngthansanga chuan Chanmari FC aṭangin PC Zosanga a la lut a, BVT-in an mamawh striker an nei ta.
PC Zosanga hian MPL-ah BVT tan a lo khel tawh a, coach Chawnga hnuaiah NECS Cup inelnaah Bethlehem Vengthlang tan a khel tawh bawk. Hei vang hian Luangmual FC striker hlui PC Zosanga hi a club tharah a tlangnel nghal ang.
BVT coach Chawnga chuan, "PC Zosanga kan lalut thei hi kan lawm a, team tichaktu a nih ngei ka beisei. Lungleiah chak lo zo chiah mah ila kan hnual phah lo a, kan la phur hle a ni. Lungleia ṭantu kan nei ṭha te khan minti lawm a, Lammualah min ṭantute tan lawmna siam ngei kan tum ang," tiin mipui vanga an phur thu a sawi.
BVT hian match hnuhnung berah Ramhlun North hneh lo mah se point 12 an hmu tawh a, semifinal thleng pha turin an dinhmun a la ṭha.
Police ve thung
Mizoram Police-in Lungleiah Aizawl FC lakah point khat an hlawh chhuak satliah a ni lo a, goal hnih an chhuah hnuah an sut leh vek. BS-a hnuaiah Police an danglam a, goal an chhuah hnuah an beidawng tawh lo.
BVT an hmachhawn hunah Police-in Leitlangpuia zin ve lo Lalfakzuala an chhawr thei dawn a, an goal nawr a na sawt ang. Aizawl FC lakah MFA Super Cup-a best keeper Lal-
ṭanpuia a chesual a, goal an chhuah. Hemi chungchanga zawhna chhangin BS-a chuan, "Kan keeper zawng zawng hi ka ring vek a, an inven chhawk ang. BVT nen chuan Andrew-a a inlan ang," tiin Vanglaini a hrilh.
Armed Veng tlangval Andrew Lalhmingliana'n a match hmasa ber a khel dawn a, ṬP-a hi tun season-a Police no. 1 niin BS-a awm hnuah erawh Ramhlun North tlangval Ṭp-a a inhliam avangin VK. Lalmalsawma chu la khel hnem ber a ni. Armed Veng South tlangval VK-a hian Chanmari West leh Ramhlun North an hneh ṭumin goal a veng.
Vawiin Inkhel Tur
3:00 PM Dinthar FC Vs Ramhlun North
7:00 PM Bethlehem VT Vs Mizoram Police
Team Dinhmun
# Team Pld W D L GF GA GD Pts
1 Chhinga Veng 8 6 2 0 20 8 12 20
2 Aizawl FC 9 3 4 2 18 11 7 13
3 Chanmari FC 9 3 3 3 11 9 2 12
4 Bethlehem VT 8 3 3 2 9 8 1 12
5 Mizoram Police 8 2 2 4 14 24 -10 8
6 Ramhlun North 8 2 2 4 12 15 -3 8
7 Dinthar FC 8 2 2 4 9 14 -5 8
8 Chanmari West 8 2 2 4 7 11 -4 8