Goal venhim hi sual a ni lo - Mourinho

Manchester United chuan minute 64-naa Mar­cus Rashford freekick chhuih luh hmangin Benfica 1-0 in an hnen a. Jose Mourinho hote hian Portugal-a an zin hma hian Liverpool chu Anfield-ah goal awm loin an draw a, Portuguese manager chuan Champions League-a hnehna an chan zawhah mahni goal venhim chu dan bawhchhiatna a nih loh thu a sawi.

Nilaini zan Lisbon-a Champions League in­khelah team pahnih an inveng tawn a, goal hmaah an chetla tam tawk lo. Eng­land international Rash­ford-a freekick pet chu kee­per Mile Svilar-a'n lo man chat mah se a tawlh hnun luat lutuk avangin an goal-ah a keng lut.

Kum 18 leh ni 52 chauha upa Benfica keeper hi Champions League khel thei keeper naupang ber a ni a, tawnhriat ngah tawk loh avangin vawi khat chesual mah se Belgian keeper Svilar che a hmuh a nuam a, Bayern Munich keeper Manuel Neuer te khelh dan keeper-sweeper anga khel thei turin theihna a nei a ni. Benfica hi an match hmasa pathumah an tlawm ta vek - an club record chhiat ber ṭum a ni.

Mourinho naute hian Premier League match hnu­hnung berah Liverpool chu goal awm loin an inhnehtawk pui a, an goal venhim ringawt an ngaih pawimawh avangin sawisel an hlawh. Lisbon-ah hian minute 45 hmasa lam chu Anfield-a an khelh ang thoin an khel a, inkhel chawhnu lamah an game a kang hret thung.

A club hlui Benfica hnehtu Mourinho chuan, "A chang chuan mahni goal venhim lutuk hi dan bawhchhiatna ni mai hian ka hre ṭhin, mahse a ni lo. Liverpool lakah game ṭha tak kan khel tawh a, Benfica pawh minute 90 chhung nawr theih an nih loh zia kan hria. Goal venhim tuma kan khelh chhan chu result ṭha neih kan duh vang a ni," tiin game mawi a result ṭha a pawimawh hmasak thu a sawi.

Manchester United hian an match hmasa lamah Basel leh CSKA Moscow te an hneh tawh bawk a, match thum khelhah point kua hmuin last 16 lut turin an tan kawng a inhawng zau tawh hle. Nilaini zan group match dangah Russian club Moscow hi an mahni mualah ngei Swiss club Basel chuan si hnih faiin an va luhchhuah ve bawk.