Ramhlun N hmaah Dinthar leh Rova fiahna
Dinthar FC-in coach Vanlalrova hnuaia an match hmasa berah Chanmari West FC an hneh a, vawiin tlai dar 3:00 hian anmahni ang bawka point riat hmutu Ramhlun North an hmachhawn ang.
Mizoram Premier League-a tawnhriat nei ṭha Rova'n huaisen takin Lungleiah Nigerian midfielder Clarence Carter leh player khel ṭhang deuhte bench-ah a ṭhuttir ngam a, Dinthar FC an chak.
Ramhlun North an hmachhawn hunah pawh Rova hian an ṭhatna turin thutlukna a siam ngam a rinawm. Luangmual FC coach hlui Rova chuan, "MPL club enkawl leh hun hi ka mit thla ṭhin a, Dinthar FC-in hun remchang min pe hi ka lawm. Theihtawp ka chhuah zel dawn a, Ramhlun North lakah pawh result ṭha neih ngei ka beisei," tiin a sawi.
Samson Ramengmawia hoten Lungeiah Bethlehem Vengthlang lakah hnehna an chang a, Liberian defender Korhena A. Boekai an neih hnuah goal an chhuah lo a, striker tlan chak Lalliansanga (Notea) a dam leh tawh bawk.
Ramhlun North coach Samson-a chuan, "Kan result ṭha hi chhawm nun zel kan duh a, point thum kan hmuh leh chuan semifinal kawng a awl sawt dawn a, chuvangin Lunglei aia nasain kan ṭang ang," tiin Vanglaini a hrilh.