Ram tan inhliam Mane an ko

Malpui hliam vanga chawl mek Liverpool forward Sadio Mane chu thla leh a World Cup qualifier khel tur Senegal squad-ah koh tel a ni.

October thlatir khan Premier League club Reds hian an forward hi chawlhkar ruk chhung vel chawlh a ngaih tur thu an sawi tawh. Senegal hian November 10 leh 14 hian South Africa an hma­chhawn dawn a, Mane hi an chhawr lui a nih pawhin dam pang­ngai var chu a ni hman kher lo ang.

Senegal coach Aliou Cisse chuan, "Mane hian zawi muangin mimal training a nei thei tawh a, kar lehah chuan tun aia nasa zawkin a bei thei tawh ang. South Africa nen kan inkhelh hunah chuan harsatna nei loin a inlan theih ngei ka beisei a ni," tiin a sawi.

Senegal hian kum 2002 khan a vawi khat nan World Cup hi an lo khel ve tawh a, he mi ṭum hian quarterfinal an thleng. Nakkum World Cup khel phak tur hian match hnih khelh turah hian point hnih an hmuh belh thei a nih chuan Russia pan turin ticket an nei ang.

South Africa leh Senegal te hi nikum khan an inhmachhawn tawh a, Senegal hi an chak lo. Mahse, inkhel thununtu Gha­naian referee Joseph Lamptey-a'n South Africa penalty a pek danah thil dik tawk lo a awm a, football thuneitu sang ber FIFA chuan Lamptey hi damchhung atan an hrem bakah he match hi khelh nawn turin an ti a ni.