PSG an hrang zel

Nilani zan khan Neymar, Kylian Mbappe, Edinson Cavani leh Angel di Maria te goal hmangin Paris St-Germain chuan Anderlecht 4-0 in an va luhchhuah a, Ligue 1 club hian Champions League group match thum an khelhah hnehna an cheng fai vek.

PSG hian an hmatawng pathum lakkhawm nan hian pound maktaduai 420 vel an seng tura ngaih a ni a, tun thleng chuan an la tisual lo niin a lang. Tun season inelna hrang hrangah match 13 khel tawhin vawi 12 an chak tawh a, tlawm an la nei lo.

Kum 18 mi Mbappe chuan, "Hnehna chan tumin khualmualah kan kal a, Paris lamah point thum kan hawn theih avangin a lawmawm hle. Chak ringawt a ni lo a, nuam ti tak chungin football mawi taka kan khelh theih avangin a lawmawm hle," a ti.

French rawlthar Mbappe hian season hmasa khan AS Monaco chu semifinal a hruai thleng, Champions League bikah hian goal riat khung tawhin kum 20 hnuai lamah ani ai goal khung hneman awm lo.