Bengaluru-in AFC Cup final thleng zo lo

ISL club Bengaluru FC-in kum zawna AFC Cup final thlen an tumna chu Tajikistan club FC Istiklol lakah a thamral. Nilaini zan khan Sree Kanteerava Stadium-ah Bengaluru FC leh an mikhual FC Istiklol te hi 2-2 in an inhnehtawk a, Tajikistan club hian an mualah 1-0 a hnehna an chan tawh avangin final an lut ta a ni.

Final hi November 4 khian Istiklol FC khelmual Hisor Central Stadium-ah khelh a ni dawn a, Tajikistan club hian champion lai Al-Quwa Al-Jawiya an hmachhawn ang.

Inkhel chu

Bengaluru FC-in khualmuala result ṭha an hlawhchhuah theih loh avangin final thleng turin chak an mamawh a, amaherawhchu an bul ṭan dan a fuh lo. India international keeper Gurpreet Singh Sandhu-a'n penalty chawi nghalin minute hnihna lekah Nuriddin Davronov-a'n FC Istiklol tan a khung nghal.

Minute 24-naah Harmanjyot Singh Khabra throw-in na tak chu Rahul Bheke-a'n tauh lutin ISL club tan beiseina a siam a, amaherawhchu goal an chhuah tawh avangin chak turin goal hnih dang an mamawh. Harsatna belchhah turin Khabra-a'n minute 42-naah yellow card vawi hnihna a hmu a, Bengaluru FC-in player 10-a an khelh a ṭul phah.

Mualneitu BFC-in tlem zawkin khel mah se second half-ah thunun a, an finishing ṭhat loh erawh an tuar thung. Minute 56-naah Manuchekhr Dzhalilov cross duhthusam chu Dmitry Barkov-a'n Tajikistan club dinhmun sawhngheh nan goal-ah a chantir a, BFC erawh an la beidawng lo.

Mizo tlangval Daniel Lalhlim­puia'n Bengaluru FC beiseina tinung turin minute 65-naah penalty a hlawh chhuak a, Sunil Chhetri-a'n siphurh sut nan a hmang. Bengaluru lamin goal dang khung belh leh tum mah se FC Istiklol an ṭang tluan a, goal dang a luh belh tawh lo.

An vanduai

Bengaluru FC-in first leg an khelh ṭhat loh an tuar a, an vanduai tel bawk. Second leg-ah hnehna chak tumin inpuahchah mah se minute hnihna leka an penalty chawi chu inkhel danglamna a ni.

Replay aṭanga a lan danin keeper Gurpreet Singh Sandhu-a'n FC Istiklol forward Fathuloev Fathullo a khawih fuh lo a, mikhual lamin an dinhmun sawhngheh nana an hman zui avangin ISL club an tho chhuak thei ta lo.

AFC Cup inkhel pawimawh Inter-Zone final-ah hian Mizo tlangval Daniel chuan Bengaluru FC tan inkhel bul a ṭan a, Mizo dang an inlan lo.