FIFA U17 World Cup ; Brazil leh Ghana ten quarterfinal an lut

FIFA U17 World Cup Nilai zana inkhelah Brazil leh Ghana ten an khingpui Honduras leh Niger te hnehin quarterfinal an lut. Team ṭha pariat a hriat kim ta a, quarterfinal hi tunkar tawp hian khelh a ni ang.

Vawi thum champion tawh Brazil hian Pathianni zanah Germany an hmachhawn ang a, vawi hnih champion tawh Ghana hian quarterfinal match hmasa berah Inrinni hian Mali nen an inkhel dawn. Inrinni zan hian England leh United States te an inkhel ang a, Spain leh Iran te Pathianni tlaiah an inkhel bawk ang.

Ghana 2 - 0 Niger

African ram pahnih inkhelah tawnhriat ngah zawk Ghana an chungnung a, Navi Mumbai-a inkhelah Black Starlets hian Eric Ayiah penalty leh substitute Richard Danso te goal hmangin Niger 2-0 in an hneh.

Ghana hian first half an thunun a, Niger-in attempt vawi khat chiah an neih laiin vawi 13 zet an attempt an nei hman. Goal chance hmasa ber chu minute 25-naa thleng niin Edmund Arko-Mensah ball pet kawh ṭha tak chu Niger goalkeeper Khaled Lawali-a'n a dang ṭha hle.

First half injury time-ah goal lut chauhin Eric Ayiah chuan Farouk Idrissa laka a penalty hlawhchhuah chu goal-ah a chantir. Second half-ah Ghana an chungnung chhunzawm a, Gideon Mensah-a'n chance ṭha a hlah hnuah captain Ayiah-a'n penalty vawi hnihna a khung nawn thei lo.

Minute 90-naah substitute Danso-a'n box pawn aṭangin na takin a pet a, Niger keeper-in dang zo loin Ghana-in Dr. DY Patil Stadium-ah goal hnih an khung a, Niger-in an

khung ve lo.

Brazil 3 - 0 Honduras

Champion ngun ber Nigeria chu (5titles) kuminah inelna an hmachhawn loh avangin India rama inlan zinga champion ngun ber chu Brazil an ni a, football thiam ram hian Honduras lakah an thiamna an pho lang.

South American ram hian Kochi-ah game mawi an khel a, minute 11-na lekah Honduras tlarhnung ṭhiatin Alan-a cross yard ruk lek aṭangin Brenner-a'n a khung. Brazil lamin goal an khung hma bakah inkhel thunun mah se Honduras player Luis Palma hmangin darkar chanve pelh hreta chance an nei a, Selecao tan inthlahdaha thiang lo.

Minute 44-naah Brazil-in Marcos Antonio hmangin goal hnihna an khung a, second half-ah Brenner-a'n Selecao goal thumna a khung leh bawk. Honduras striker Carlos Mejia-a'n goal ban a pet per a, goal-ah a luh miau loh avangin Brazil-in an match hnuhnung pathumnah goal an chhuah tawh lo.

Goal 151

FIFA U17 World Cup India rama khelh mekah match 44 khelh a ni tawh a, goal 151 a lut tawh. Match tina goal 3.43 zel lut ang a ni.

France striker Amine Gouiri leh Mali striker Lassana Ndiaye ten goal nga ve ve khung tawhin top scorer an ni mek a, amaherawhchu Les Blues-in Spain an hneh loh avangin Lyon aṭanga inzir chhuak Gouiri chuan a khung belh tawh lo ang.

Last 16 - Results

October 16, Thawhṭanni
Colombia 0 - 4 Germany
Paraguary 0 - 5 United States
October 17, Thawhlehni
Iran 2 - 1 Mexico
France 1 - 2 Spain
England 0 - 0 Japan
Penalty-ah England 5-3 in an chak
Mali 5 - 1 Iraq
October 18, Nilaini
Ghana 2 - 0 Niger
GHA : Eric Ayiah 45+4'(P); Danso 90'
Brazil 3 - 0 Honduras
BRA : Brenner 11', 56';
   Marcos Antônio 44'
Quarterfinal - Fixtures
October 21, Inrinni
5:00 PM Mali Vs Ghana
8:00 PM United States Vs England
October 22, Pathianni
5:00 PM Spain Vs Iran
8:00 PM Germany vs Brazil