FIFA U17 World Cup - India thlen chin a sang em?

FIFA U17 World Cup group stage khelh zawh a ni a, India U17 thlen chinah lawm tur a ni em? tih chu zawhna lo piang a ni. Indian football hrechiangtuten World Cup kan khelh hrim hrim avangin lawmin an kut an beng ang a, Indian football dinhmun dik tak hre lo tu tan erawh kan thlen chin hi nuihzatthlak mai a ni ang.

India-in hneh nei miah loin kan World Cup hmasa ber kan khar a, theihnghilh thiang lo chu he World Cup hi kan thiam vanga khel kan ni lo - a thlengtu ram kan nih vang chauha khel thei kan ni. India-in eng level-ah pawh FIFA World Cup kan khelh hmasak ber a ni.

Kan thlen chin

FIFA U17 World Cup-ah team 24 an tel a, group parukah team pali zel awmin ṭhen hran an ni. Group tina a tiṭha pahnih chu last 16 inpetkai chiang sa an ni a, pathumna zinga a tiṭha zual paliin knockout round an lut bawk - chumi awmzia chu team 24 a-

ṭangin team pariat chiah an tla tihna a ni a, team pariat zingah India an tel.

India hi last 16 in pet kai lo team tlemte zingah an tel a ni mai lo a, team pariat tling lo zingah pawh a hniam ber an ni.

Team 24 zingah point hmu miah loa World Cup mangṭha pahnih an awm a, India leh North Korea an ni. North Korea aiin India dinhmun a la chhe cheu - ram pahnih danglamna hi goal difference a ni. India hian match thum an khelhah goal kua ngawt an chhuah a, goal khat an khung. India goal difference hi -8 a ni a, North Korea hi -5 a ni thung.

India an vanduai?

India-in last 16 an lut lo a, match thumah chak lo vek mah se an awm­na group hi an 'vanduai' tia sawi theih a ni.

Group A-ah Colombia, USA leh Ghana an awmpui a, team ṭha ṭhiau an ni. Hetih lai hian Group E-ah chuan France leh Japan te awm pui Honduras leh New Caledonia te chu India tan pawh cho ena en ve theih an ni.

Group E-ah England, Iraq, Mexico leh Chile an awm a, Mexico leh Chile hi India-in World Cup ṭan hmaa friendly match a lo khelhpui tawhte niin Chile hi an inhnehtawkpui - he group aṭanga pahnihna Iraq pawh hian point li hmu chungin last 16 an lut a, point hnih hmutu Mexico pawhin an lut.

India awmna Group A-ah erawh pathumna USA pawhin point ruk an hmu a, hmahruaitu Ghana nena an danglamna thlentu chu goal difference chauh a ni.

Hmabak a êng?

India-in hnehna chang miah lo chungin a World Cup khelh hmasak ber mangṭha mah se Indian football ngainatute India thlen chinah an lawm a, 'hmabak a êng' tih chu an ṭawngkam a ni.

India hi chak lo fai vek mah se an khelh danah erawh lawmna tur tam tak a awm. USA lakah minute 30-naah atthlak takin penalty an chawi a, match hmuhnawm tak lantir chungin an tlawm.

Colombia lakah India inkhel a hmuhnawm lehzual a, FIFA tour­nament-a India goal hmasa ber chu Jeakson Singh chuan a khung hial - India hian bar an pet per te, goalkeeper chauh an hmachhawn hnua an pet goal lohte kha an thlir kir chuan an ui ve ngei ang a, South American team laka khati taka ṭhaa an khel thei kha kan sulhnu neih ṭhin ngaihtuah chuan inchhuanna tur a ni.

Ghana lak­ah erawh India-in loh theih lohin attacking game an khelh a ngai a, US leh Colombia laka an game an phak lo.

Player beiseiawm

India tan thu hriat nuam em em tur chu U17 squad zingah player beiseiawm tak tak hmuh tur an awm nual.

India goalkeeper Dheeraj Singh chu mipui mit la bera chhal ngam a ni a, Manipur rawlthar hian hmabak a nei êng hle.

Tlarhnung lamah right back Boris Singh Thangjam thiamzia hmuh hmaih theih a ni lo a, tlarhnung laia ding Anwar Ali chu India hmachhawn ṭhintu coach-ten an fak rawn a ni. Goal khungtu Jeakson Singh-a chanchinin ngaihven a hlawh a, captain Amarjit Singh leh Rahul Kannoly te sawi hmaih an thiang lo.

Tlar hmaa India innghahna Aniket Jhadav hi kum 2019-a India-in Asian Cup an khelh hunah squad-ah a tel hman tawh a nih pawhin a mak lo ang.

AIFF beiseina

All India Football Federation chuan kum 2019 U20 World Cup thlen a dil dawn a, hei hi rilrua dah ran chungin AIFF chuan tuna U17 World Cup player-te hi team anga enkawl chhunzawm a duh a, I League khelhtir a tum - player te hi thla khatah 50,000 ṭheuh hlawh turin kum thum chhung atan contract a zawrh hlawm a, tuna an buaina chu sum ngah ISL club leh I League club liante an awm mai mai bik lo.

Player ṭhenkhatin AIFF enkawlna hnuaia awm zui an remtih laiin Dheeraj Singh, Suresh Singh, Jeakson Singh, Amarjit Singh, Komal Thatal leh Rahul KP te chu contract ziak duh rih lo langsar zual zinga tel anga sawi an ni.

Player-te hian hlawh piah lamah contract-a inziak anga AIFF-in kum nga chhung agent neih leh club dang dawr an phalsak lo tur lai chu an duh lo nia sawi a ni a, ISL leh I League club te hian thla khata nuai 1.5 hlawh turin an sawm tlangpui - club dang biak an phalsak bawk.

Mizo tan chona?

India U17 squad-ah Mizo pa­khat chiah a tel a, a hming chu Laleng­mawia a ni. Vaivakawn rawlthar Apuia hi USA nena match hmasa berah bench aṭangin a tlan lut a, Ghana nen an inhmachhawn ṭumin a inlan leh bawk. Ṭhenawm state Manipur-in player pariat ngawt an thawh laiin player pakhat bak kan nei thei lo a, hei hian Mizo zingah zawhna tam tak a hring.

India U17 squad-ah Luis Matos-a'n squad siksawi turin hun a nei tam tawk lo a, Nicolai Adam hunlai khan a assistant coach chu Meitei pa a ni. Mizo player-ten India squad-a hmun chang tam turin tun aia kan ṭan lehzual a ngai tihna a ni a, chutihrual chuan coaching lamah Mizo player-te ṭhat dan intluk tlanga lo duhsak thei tur khawpa thleng sang an awm ve a ngai, tihna a ni tel bawk.