Goal 100 khung thei Lionel Messi

Lionel Messi chuan Euro­pean competition-ah goal 100 a khung tling ta. Nilaini zan Champions League inkhelah Barcelona forward hian Olympiakos lakah goal khat khungin Catalan club hi 3-1 in hnehna a chanpui.

Nou Camp-ah Olympiakos defender Dimitris Nikolaou-a'n an mahni lama tihluh hnuah chawlhlawk hma deuhin Barca defender Gerard Pique chu yellow card vawi hnih hmuh vangin hnawhchhuah a ni.

Second half-ah player kim loa khel Barcelona an buai chuang lo. Kum 30 mi Messi-a'n freekick aṭangin an hmahruaina goal a khung bakah Lucas Digne goal khung tur a siamsak bawk, hun tawp dawna Nikolaou-a tauh luhin mikhual mualpho tur a chhanhim zo tawh lo.

Messi goal 100

Kum 2005 November thla khan Barcelona hian an khelmualah Greek club Panathinaikos chu 5-0 in an sawp a, hemi ṭum hian Messi-a'n European football-ah goal a khung ṭan, goal hmasa ber a luh aṭangin tun thlengin Messi hi a hawikir leh tawh lo.

Barcelona tana goal khung hnem ber dinhmun luahtu hian Champions League match 118 a khelhah goal 97 a khung bakah European Super Cup-ah goal thum a khung tawh bawk - a club hi Champions League nomawi vawi li ngawt a chawi pui tawh a ni.

European competition-ah hian Messi tih lohah chuan Cristiano Ronaldo hi goal 100 khung tling thei awmchhun a ni bawk. Real Madrid forward hian match 151 a khelh

aṭangin goal 112 khung tawh­in record nei ṭha ber a ni mek.

Barcelona coach Ernesto Valverde chuan, "Nitina a training hmutu tan chuan goal 100 a khung tling hi thil mak leh thar a ni hran lo," tiin a sawi. Valverde hian Messi chuan goal 200 pawh a khung theih a beisei thu fiamthuin a sawi zui bawk.

Allegri-a'n a duhkhawp lo

Season hmasa Champions League finalist Juventus chuan Sporting lakah si khat an phurh zet hnuah Miralem Pjanic leh Mario Mandzukic te hmangin 2-1 in hnehna an chang let a, manger Massimiliano Allegri chuan hnehna chang mah se a naute khelh dan chu duhthusam a la nih loh thu a sawi.

Juventus manager Mas­similiano Allegri chuan, "Champions League a nih tawh chuan engtik lai mahin a awlsam ngai lo. Tihsual kan la ngah hle, a bik takin a tir lam minute 20 chhung kha chuan kan ruahman angin kan khel chhuak lo chiang hle, point thum kan hmu hi kan vannei," tiin a sawi.