Aizawl FC an nghet, Chanmari an nghing

I League club Aizawl FC-in nimin inkhelah an elpui Chanmari FC 3-1 a hnehin Mizo­ram Premier League table-ah pahnihnaah an invawrh chho.

Chanmari FC-in MC Mal­sawmzuala hmangin goal khung hmasa mah se Aizawl FC-in William Lalnunfela goal hnih leh Andrei Ionescu goal khat hmangin an chhanglet.

AFC-in point 13 hmuin semi­final kawng an zawh. MPL champion lai erawh match hnuhnung pangaah point thum chiah an hmuh avangin an dinhmun a ṭha lo.

AFC an chungnung

Aizawl FC-in first half an thunun a, ball possession 60% an neih phak bakah goal attempt vawi 13 an nei a, Chanmari FC-in vawi hnih chiah an nei.

I League club-in inkhel thunun mah se Liandala'n (Sena) penalty a chawi avangin player thar MC Malsawmzuala'n minute 20-naah goal hmahruai a khung.

Hemi hmain captain Lalro­sanga chu inhliam vanga lak­chhuah a ni a, Chanmari FC hi goal nei chungin an buai hle.

Pune City FC aṭanga Chan­mari hawh midfielder Sajid Hossain tihsual vangin Aizawl FC-in an vaw let a, Albert Zo­hming­mawia thawhrah sengin minute 33-naah William Lalnun­fela'n an siphurh a sut. Minute li hnuah H. Lalmuankima ball ṭha changtu Romanian midfielder Andrei Ionescu-a'n cool takin a khung leh bawk.

Aizawl FC midfielder Albert leh Andrei ten chance ṭha an hlah a, Chanmari FC forward Jakob Lalrawngbawla'n vei aṭanga Ṭhasiama cross goal ruakah a tauh goal thei lo.

A goal belh

Second half-ah Chanmari FC game kang hret mah se Aizawl FC an insawhnghet hman.

Romanian midfielder An­drei-a thiamna hmuh chhun­zawm a ni a, a ball siamsak duhthusam chu William-a'n goal ruakah a khung.

Hun tawp hma hretin AFC winger MK-a'n chak takin a la lut a, keeper MS Dawngliana chip khum mah se Thomas Lalengkima'n a pet chhuak hman.

Chanmari FC lam hi Pune-a an zin avangin an chau tih a lang a, lawmna tur awmchhun chu Pune City aṭanga an hawh forward Rani Ahammed Nigam a rin ngam dawn tih zawng a ni.

ZoFooty Statistics
Aizawl FC 3 - 1 Chanmari FC
AFC : William Lalnunfela 33', 65'; Andrei Ionescu 37'
CFC : MC Malsawmzuala 20' (P)
MoM : Andrei Ionescu
57% Ball Possession 43%
23 (14) Shots (On Target) 4(2)
3 Yellow Card(s) 0
0 Red Card(s) 0
Powered by Rainbow Multibrand Mobile Showroom