Hijab chungchangah SC judge-te inlungrual lo ; Bench lian zawka ngaihtuah turin an rawt

Karnataka state-in classroom chhunga Muslim hmeichhiaten an lu an khuhna, hijab hman khapna thupek a siam chungchangah Supreme Court judge pahnihte an ngaihdan a inhmu thei lo. Hei vang hian bench lian zawkin a ngaihtuah turin an rawt

Karnataka sorkarin classroom chhunga hijab a khap chungchanga petition lutte chu Supreme Court-a judge pahnih awmna bench hian a ngaihtuah a ni. Mahse justice Hemant Gupta chuan zirna ina hijab khap chu a thlawp laiin, justice Sudhanshu Dhulia chuan hmeichhiaten lehkha an zir chu a pawimawh a, an zir theihna a nih chuan hijab khapna tihtawp a ngai tih a sawi ve thung. Hijab hman leh hman loh chu mimal duhthlanna tur a ni, a ti.

Judge pahnihte hi an inlungrual theih loh avangin chief justice of India hnenah hemi chungchang ngaihtuah a, thultukna siam turin judge pathum awmna bench siam turin an ta a ni.

Karnataka sorkarin February 5-a zirna ina hijab khapna thupek a siam hi Mulsim zirlaite chuan Karnataka High Court-ah an khing a, mahse High Court chuan Islam dan zawmna turin classroom chhungah hijab hman kher a ngai lo tiin an ngenna hi a lo hnawlsak a ni. Hemi hnu hian zirlaite hian Supreme Court-ah an khing leh a ni.

Supreme Court lamin thutlukna a la siam theih loh vangin hijab khapna chu an state-ah hman chhunzawm a la ni dawn tih nimin khan Karnataka education minister BC Nagesh chuan a sawi. Zirlaite chu sorkar thupekin a tarlan tawh angin uniform nen chauha zirna ina kal turin a ti.

Karnataka police-te pawhin Hijab chungchangah thutlukna siam theih loha a la awm avang hian buaina a chhuah palh venthawn thilah venhimna lam pawh uluk taka an kalpui thu an sawi. SP Udupi Akshay Hakay chuan hmun pawimawh hrang hranga police-te duty tir an nih thu sawiin, patrolling pawh neih reng a ni tih a sawi.